ზაფხულში გიორგი გიგაშვილი გერმანიასა და ნიდერლანდებში კონცერტების სერიას გამართავს. ინფორმაციას ამის შესახებ მუსიკოსი სოციალურ ქსელში აზიარებს. ქართველი პიანისტი მსმენელის წინაშე გერმანიის წამყვან ახალგაზრდულ ორკესტრთან, Bundesjugendorchester-თან ერთად წარდგება და რახმანინოვის საფორტეპიანო კონცერტ No. 3-ს შეასრულებს. ორკესტრს გერმანელი დირიჟორი აურელ დავიდიუკი უხელმძღვანებელებს. ტურნე ამსტერდამში დაიწყება, შემდეგ კი გერმანიის სხვადასხვა ქალაქში გაგრძელდება. 29-ივლისიდან 30 აგვისტომდე გიგაშვილი ევროპის ცნობილ საკონცერტო დარბაზებში ჯამში 5 კონცერტს გამართავს.
1-ელ და 2 სექტემბერს კი Bundesjugendorchester, უკვე მირიან ხუხუნაიშვილის დირიჟორობით, თბილისს ეწვევა და გიგაშვილთან ერთად ქართველი მსმენელის წინაშე დაუკრავს. დამატებითი დეტალები უახლოეს მომავალში გახდება ცნობილი.
