ალიშა კისი მუსიკალურ ინდუსტრიაში ორ ათწლეულზე მეტია, მოღვაწეობს, თუმცა, მისი თქმით, ეს სფერო დღესაც იმავე „ბიჭების კლუბად“ რჩება, როგორც მისი კარიერის დასაწყისში იყო.
გამოცემა The Times-თან ბოლო ინტერვიუში გრემის 17-გზის მფლობელმა არტისტმა გულახდილად ისაუბრა იმ უთანასწორობაზე, რომელსაც ის, როგორც ავტორი, მომღერალი და პროდიუსერი ქალი, ყოველდღიურად აწყდება. „მუსიკალური სამყარო „ძველი ბიჭების ქსელად“ იქცა, სადაც ინჟინერიასა და პროდიუსინგში მომუშავე არაჩვეულებრივი ქალებისთვის კარი დახურულია. ქალები ამ ინდუსტრიის მხოლოდ 2 პროცენტს შეადგენენ. მე თავად ვარ პროდიუსერი და ჩემთვის შოკისმომგვრელია იმის გააზრება, რომ ამ რეალობაში ვცხოვრობთ“, – განაცხადა მომღერალმა.
ალიშა კისი ინტერვიუში აღნიშნავს, რომ პრობლემა მხოლოდ წარმომადგენლობის ნაკლებობა არ არის, საქმე სისტემურ ბარიერებსაც ეხება:
Merriam-Webster – ამერიკული ლექსიკონების გამოცემა old boy network-ს (ძველი ბიჭების ქსელი) – ასე განმარტავს: ეს არის არაფორმალური სისტემა, სადაც შეძლებული მამაკაცები, რომლებსაც მსგავსი სოციალური და საგანმანათლებლო წარსული აქვთ, ერთმანეთს კარიერულ წინსვლაში ეხმარებიან.
„ამ ყველაფერს არავინ გეუბნება. გიწევს, საქმე გქონდეს მენეჯერებთან და იურისტებთან, რომლებსაც საკუთარი წილის აღება და ხშირად ზედმეტის მოთხოვნაც უყვართ, მაგრამ არასდროს გეკითხებიან, თუ როგორ ვიმოქმედოთ ისე, რომ ამ სფეროში დიდხანს დავრჩეთ.” – თქვა ალიშა კისმა ინტერვიუში.
იმის ნაცვლად, რომ ამაზე უბრალოდ გავბრაზებულიყავი, მივხვდი, დადგა დრო, შესაძლებლობები თავადვე შეგვექმნა“, – დასძინა მან.
სწორედ ამ იდეიდან შეიქმნა She Is the Music – არაკომერციული ორგანიზაცია, რომლის თანადამფუძნებელიც ალიშა კისია. ეს ორგანიზაცია ქალებისთვის მუსიკალურ ინდუსტრიაში ხელსაყრელი გარემოს შექმნას, მუსიკოსებისთვის სიმღერების წერის სესიებს, მენტორობასა და საგანმანათლებლო პროგრამებს ემსახურება. თებერვალში ორგანიზაციამ უკვე მეორედ უმასპინძლა ღონისძიებას Women Sharing the Spotlight, სადაც არტისტმა Megan Moroney და მისი სრულად ქალებით დაკომპლექტებული გუნდი დააჯილდოვა.
„დღევანდელი საღამო სწორედ იმისთვისაა, რომ ვთქვათ: მოიცადე, მე მაქვს ეს პოზიცია და შემიძლია კარი გავაღო. ერთია, როცა კარზე აკაკუნებ, რომ შეგიშვან და სრულიად სხვაა, როცა ვინმე თავად აღებს კარს და გეუბნება, შემოდი და შემომიერთდი.” – აღნიშნა ალიშა კისმა ცერემონიაზე.
რაც შეეხება მუსიკალურ მხარეს, არტისტმა ბოლო ალბომი, სახელწოდებით Keys, 2021 წელს გამოუშვა. ნამუშევარი Billboard 200-ის ჩარტში 41-ე ადგილზე მოხვდა, თუმცა აღსანიშნავია, რომ ამავე რეიტინგის პირველ პოზიციას ალიშა კისის ხუთი სხვადასხვა ალბომი იკავებდა.
როგორც მომღერალმა The Times-ს განუცხადა, ის ამჟამად ახალ სტუდიურ ალბომზე მუშაობს:
„მუსიკა თითქმის მზადაა და ეს ძალიან მახარებს. არსებობს სიმღერების წერის ოსტატობა და უნარი, შექმნა ისეთი კომპოზიციები, რომლებიც ადამიანებისთვის განსაკუთრებული მნიშვნელობის მატარებელია. სწორედ ეს განსაზღვრავს ჩემი შემოქმედების ხანგრძლივობას და ამას ახალ ალბომშიც აუცილებლად იპოვით“.
