ჭორების დაწყებიდან რვა თვის შემდეგ ჰარი სტაილსი და ზოი კრავიცი, გავრცელებული ცნობებით, დაინიშნენ.
27 აპრილს წყარომ ჟურნალ People-ს დაუდასტურა, რომ ბრიტანელი პოპვარსკვლავი და ამერიკელი არტისტი ქორწინებას უკვე ოფიციალურად გეგმავენ. წყვილის ნიშნობის შესახებ, ანონიმურ წყაროზე დაყრდნობით, 23 აპრილს Page Six-მაც დაწერა. ახალი ამბავი მას შემდეგ გავრცელდა, რაც ფანებმა კრავიცის ხელზე მბრწყინავი ბრილიანტის ბეჭედი შენიშნეს.
„ბილბორდი” კომენტარისთვის სტაილსისა და კრავიცის წარმომადგენლებს დაუკავშირდა, თუმცა ჯერჯერობით ნიშნობა არცერთ მათგანს არ დაუდასტურებია.
ბოლო დროს წყვილი ერთად არაერთხელ გამოჩნდა ლონდონსა და რომში – ქალაქებში, სადაც მუსიკოსი ძირითად დროს ატარებდა Billboard 200-ის ლიდერი ალბომის, Kiss All the Time. Disco, Occasionally-ზე მუშაობისას. ინტერნეტში ვრცელდებოდა ფანების მიერ გადაღებული ფოტო-ვიდეომასალა, რომლებზეც მომღერალი და მსახიობი ქუჩებში სეირნობის დროს ხელჩაკიდებული არიან დაფიქსირებული.
ჰარი სტაილსი ბოლოს ტეილორ რასელს ხვდებოდა, რომელთან ურთიერთობაც წელიწადზე ნაკლებ დროში დასრულდა. მანამდე მას რომანი ჰქონდა ოლივია უაილდთან, კამილ როუსა და ტეილორ სვიფტთან. ეს უკანასკნელი კრავიცის კარგი მეგობარია. მსახიობი სვიფტის Midnights ალბომში შესული Lavendar Haze-ის თანაავტორია.
კრავიცი – რომელიც მუსიკოს ლენი კრავიცისა და მსახიობ ლიზა ბონეს ქალიშვილია – მანამდე, 2019-2021 წლებში, ქორწინებაში იმყოფებოდა კარლ გლასმენთან. ის ასევე დანიშნული იყო ჩენინგ ტატუმზე, მაგრამ სამი წლის შემდეგ, 2024 წელს, მათი ურთიერთობაც დასრულდა.
ჰარი სტაილსი ამჟამად ახალი ალბომის მხარდამჭერი მსოფლიო ტურნესთვის ემზადება. მაისში ის დაიწყებს მინირეზიდენციების სერიას ამსტერდამში, კრუიფის არენაზე, შემდეგ კი ლონდონში, ნიუ-იორკსა და სხვა ქალაქებში გადაინაცვლებს.
