პეკინის საერთაშორისო კინოფესტივალზე ქართველი რეჟისორის, ანა ურუშაძის ფილმი „მეორეხარისხოვანი როლი“ (Supporting Role) საუკეთესო მუსიკალური გაფორმებისთვის დაჯილდოვდა. პრიზი ფილმის კომპოზიტორს, ესტონელ სტენ შერიპოვს (Sten Sheripov) გადაეცა.
„მეორეხარისხოვანი როლი“ სამი ქვეყნის – საქართველოს, ესტონეთისა და თურქეთის კინოპროდუქციაა. ფილმის მსოფლიო პრემიერა 2026 წლის დასაწყისში როტერდამის საერთაშორისო კინოფესტივალზე შედგა, სადაც ნამუშევარმა ჟიურის სპეციალური პრიზი და FIPRESCI-ს კინოკრიტიკოსთა პრიზი მიიღო.
ნამუშევარი ანა ურუშაძის 2017 წლის სადებიუტო ფილმის, „საშიში დედის“ წარმატებას აგრძელებს. შეგახსენებთ, რომ „საშიში დედა“ ლოკარნოს კინოფესტივალის საუკეთესო სადებიუტო ფილმის პრიზის მფლობელი გახდა, მოგვიანებით კი სარაევოს კინოფესტივალის მთავარი ჯილდოც დაიმსახურა. ფილმი ასევე ნომინირებული იყო ევროპული კინოაკადემიის Discovery Award-ზე და წარდგენილი იყო „ოსკარის“ 90-ე დაჯილდოებაზე საქართველოს სახელით.
„მეორეხარისხოვანი როლის“ სიუჟეტი ქართული კინოს ოდესღაც ცნობილი ვარსკვლავის ირგვლივ ვითარდება. ახალგაზრდა ქალ რეჟისორთან სინჯებზე ვიზიტი მისთვის საბედისწერო ხდება.
მთავარ როლს დათო ბახტაძე ასრულებს. ფილმში ასევე მონაწილეობენ: ნატო მურვანიძე, ლაშა მებუკე, ელენე მაისურაძე, ნინო კასრაძე, ეკა დემეტრაძე, სანდრო სამხარაძე, ირაკლი კვირიკაძე, მურმან ჯინორია, ზურა სტურუა, დავით დვალიშვილი.
„მეორეხარისხოვან როლზე” რამდენიმე ქვეყნის კინო საპროდუქციო კომპანია მუშაობდა: Zazafilms (საქართველო), Enkeny Films (საქართველო), Allfilm (ესტონეთი), Zeyno Film (თურქეთი), Cinetrain (შვეიცარია) და Melograno Films (აშშ).
ფილმი საქართველოში ესტონელმა ოპერატორმა რეინ კოტოვმა გადაიღო. პროექტი დააფინანსებულია საქართველოს ეროვნული კინოცენტრის, ესტონეთის კინოინსტიტუტის, ესტონეთის კულტურის ფონდის, Eurimages-ს და Creative Europe-ის MEDIA პროგრამის მიერ.
„მეორეხარისხოვანი როლი“ უკვე მოხვდა მსოფლიო კინომიმომხილველი პრესის ყურადღების ცენტრში. ფილმზე სტატიები ჟურნალმა Variety-მ და სხვა არაერთმა გავლენიანმა გამოცემამ გამოაქვეყნა.
