1-ელ მაისს, ციფრულ პლატფორმებზე „ეშმაკს აცვია პრადა 2-ის” ოფიციალური საუნდტრეკი გამოვიდა. ალბომში შედის ლედი გაგას სამი ახალი სიმღერა: Runway – Doechii-სთან ერთად შესრულებული ჰაუს-პოპი, რომელიც რამდენიმე კვირის წინ გამოვიდა, ასევე Shape of a Woman და Glamorous Life.
ფილმისთვის ახალი სიმღერები ჩაწერეს სიენა სპაირომ (Material Lover) და იზი ესკობარმაც (Evergreen Avenue).
რაც შეეხება საუნდტრეკის დანარჩენ ნაწილს, ის აერთიანებს 2020-იანი წლების ერთ-ერთ ყველაზე დახვეწილ პოპსიმღერებს, მათ შორისაა: SZA-ს Saturn, The Marías-ის No One Noticed, დუა ლიპას End of an Era, RAYE-ს Worth It, ლედისის Daydreaming, ოლივია დინის Nice to Each Other, ლოივეის Mr. Eclectic და მაილი საირუსისა და ბრიტანი ჰოვარდის Walk of Fame.
2006 წელს გამოსული ფილმის პირველი ნაწილის საუნდტრეკი ასევე დიდ ჰიტებს მოიცავდა, როგორებიცაა მადონას Vogue და U2-ს City of Blinding Lights.
„ეშმაკს აცვია პრადა 2-ში” მისი ყველა მთავარი პერსონაჟი დაბრუნდა: მერილ სტრიპი (მირანდა პრისლი), ენ ჰეთეუეი (ანდრეა საქსი), ემილი ბლანტი (ემილი ჩარლტონი) და სტენლი ტუჩი (ნაიჯელ კიპლინგი). ფილმი კინოთეატრებში პირველ მაისს გამოვიდა. პრემიერასთან დაკავშირებით, მის ვარსკვლავურ სამსახიობო დასს 4 მაისს „მეტ გალაზე” ელოდებიან. ღონისძიებამდე, რომლის თანათავმჯდომარეებიც ბიონსე, ნიკოლ კიდმანი და ვენუს უილიამსი იქნებიან, სტრიპმა ვოგის ყდა ანა ვინტურთან გაიზიარა. სწორედ ვინტურის შთაგონებით შეიქმნა ფილმის მთავარი გმირი, რომლის შესრულებისთვისაც მერილ სტრიპმა 2007 წელს ოსკარი დაიმსახურა.
მოუსმინეთ „ეშმაკს აცვია პრადა 2-ის” საუნდტრეკს:
