დაპირებისამებრ, ლიზო სიტყვა bitch-ს იბრუნებს ამავე სახელწოდების მქონე ალბომის ტრეკში. მომღერალმა თამამი სათაურის მქონე სინგლი 1-ელ მაისს გამოსცა და ფანებს ახალ სტუდიურ ალბომზე მეტი წარმოდგენა შეუქმნა. ალბომის გამოსვლა 5 ივნისს იგეგმება.
სინგლში გამოყენებულია მერედით ბრუკსის ამავე სახელწოდების, 1997 წლის Billboard Hot 100-ის მეორეადგილოსანი სიმღერა. Bitch მეორე სინგლია ლიზოს მომავალი ალბომიდან. ის მოჰყვება მანამდე გამოცემულ სიმღერას Don’t Make Me Love U.
2022 წლის Special-ის შემდგომი ალბომის შთაგონებაზე საუბრისას ლიზომ განაცხადა: „სიტყვა bitch-ის დაბრუნება ძალაა. ეს ნიშნავს ამ იარლიყის, რომელიც ადრე ქალების დასამცირებლად გამოიყენებოდა, საკუთარ თავზე აღებასა და მის გარდაქმნას თავდაჯერებულობისა და უპირობო თვითსიყვარულის გამოხატულებად. უამრავ შესანიშნავ ქალ მუსიკოსს გამოუყენებია ეს სიტყვა პოზიტიური მნიშვნელობით, მაგალითად, მერედით ბრუკსსა და მისი ელიოტს. ბუნებრივი იყო ჩემი ალბომისთვის Bitch-ის დარქმევა, რადგან ეს ჩემი საყვარელი სიტყვა გახდა, როცა მას ჩემი პირობებით ვიყენებ, რადგან მე თავად 100% bitch ვარ.”
სიმღერის თიზერში, რომელიც 30 აპრილს გამოქვეყნდა, დასაწყისში ისმის კეტ უილიამსის ხმა: „ეს არის ხაზი, რომელსაც თუ გადაკვეთავ, პრობლემები შეგექმნება,” – ფრაზა, რომელიც აღებულია მისი 2024 წლის სტენდაპ შოუდან Woke Up, სადაც მან ლიზო კრიტიკოსებისგან დაიცვა. მომღერალმა პოსტის აღწერაშიც სწორედ უილიამსის სიტყვები გამოიყენა: „შეგიძლია იყო მსუქანი, შეგიძლია იყო შავკანიანი, მაგრამ არ შეიძლება იყო მსუქანი შავკანიანი Bitch’. დღეს საღამოს Bitch გამოდის, მზად ხართ?”
ლიზომ პირველად ფრაზა ‘100% bitch’ 2017 წლის ბრილიანტის სერტიფიკატის მქონე სინგლში Truth Hurts გამოიყენა, სადაც მან ასე საკუთარი თავი მოიხსენია. ახალ ალბომში კი მომღერალი კიდევ უფრო აძლიერებს ამ იმიჯს პროვოკაციული ყდით, რომელშიც ის შუა თითს აჩვენებს. თითის ადგილას კი ლიზოს მინიატურული ვერსიაა, რომელიც გამარჯვებულ პოზაში დგას.
სპოტიფაიზე ალბომის წინასწარი გვერდის მიხედვით, ჩანაწერი 12 ტრეკს მოიცავს, სახელწოდებებით: A Toast, Happy 2 Be, Don’t Make Me Love U, Bitch, She Stole My Man, Whose Hair Is This, Little Black Cat, Sexy Ladies, That Grrrl, Too Nice, Like a Crime და Goodmorning!.
ნახეთ Bitch-ის ვიდეოკლიპი:
