Bad Bunny და Zara ერთობლივ კოლექციას აანონსებენ

Bad Bunny და Zara სპეციალურ კოლექციას – Benito Antonio-ს გამოუშვებენ. იდეა პუერტო-რიკოელი არტისტის პირადი სტილითაა შთაგონებული.

კოლექცია მის კრეატიულ დირექტორთან, ჯანთონი ოლივერასთან ერთად შეიქმნა და  150 მოდელს აერთიანებს, მათ შორის – გრაფიკულ მაისურებს, მკვეთრი ფერების შარვლებსა და ქვედაბოლოებს, დიდი ზომის  ყოველდღიურ ტანსაცმელს, კეპებს და სხვა.

„ჩემი მისია იყო, რომ ბენიტოს სტილი ზუსტად ისეთი ფორმით გამეცოცხლებინა, როგორიც ის დღეს არის –  არა შარშანდელი და არა მომავალი წლის, არამედ ახლანდელი,“ –  აღნიშნა ოლივერასმა პრესრელიზში. „მასთან ასეთმა სიახლოვემ აბსოლუტური თავდაჯერება შემმატა: ყოველი ახალი მოდელის შექმნისას ზუსტად წარმოვიდგენდი, როგორ მოირგებდა. როდესაც პირველ ნიმუშებს ხელით შევეხეთ, მივხვდი, რომ მისი კონცეფცია ზუსტად გადმოვეცით. ამ კოლაბორაციაში არის რაღაც ძალიან განსაკუთრებული –  ეს არის ორი განსხვავებული სამყაროს შეხვედრა. Zara გვაძლევს შესაძლებლობას, ეს გლობალურად გავაზიაროთ ისე, რომ ყველასთვის ხელმისაწვდომი იყოს. მინდა, ადამიანებმა ისე იგრძნონ თავი, თითქოს სიზმარში შედიან. მინდა მათ გააცნობიერონ, რომ სიმარტივე სულაც არ ნიშნავს მოსაწყენს“.

კოლექციის ვიზუალური იდენტობა არტისტმა კრეატიულ სააგენტო M/M Paris-თან თანამშრომლობით შეიმუშავა. ინსპირაციად გამოყენებულია პუერტო-რიკოს ყოველდღიური ცხოვრების დეტალები: ელექტროგადამცემი ბოძები, ქუჩის ინფრასტრუქტურა და ხელნაკეთი ტექსტურები. კრეატიული კამპანიის ფოტოები  STILLZ-მა გადაიღო –  რეჟისორმა და ფოტოგრაფმა, რომელსაც Bad Bunny-სთან მრავალწლიანი თანამშრომლობა აკავშირებს.
BAD Bunny-მ Zara-სთან კოლაბორაციაზე პირველად მინიშნება თებერვალში გააკეთა, როდესაც კალიფორნიაში, Super Bowl-ის შოუზე ბრენდის მიერ სპეციალურად მისთვის შექმნილი სრულიად თეთრი კოსტიუმით გამოვიდა. სულ ახლახან კი, ნიუ-იორკში გამართულ 2026 წლის MET Gala-ზე, მან კვლავ Zara-ს კოსტიუმი ჩაიცვა, რომელიც ბრენდმა სპეციალურად მისთვის შექმნა. 

Benito Antonio-ს სახელით დაანონსებული კოლექცია ხელმისაწვდომი იქნება 21 მაისიდან და ის მსოფლიოს მასშტაბით Zara-ს შერჩეულ მაღაზიებსა და ბრენდის ოფიციალურ ვებგვერდზე გაიყიდება. 

იხილეთ კოლექციის ფოტოები: