საქართველო-ისრაელის ამხანაგურ საფეხბურთო მატჩს ხვიჩა კვარაცხელია სოციალურ ქსელში გამოეხმაურა. საქართველოს ეროვნული ნაკრების ახალმა კაპიტანმა ინსტაგრამზე პოსტი გააზიარა, რომელსაც ფონად გასდევს „მგზავრებისა” და ტაჰას ერთობლივი ნამუშევარი „სახლი”.
ფეხბურთელის მიერ გამოქვეყნებული ფოტოების სერია მოიცავს კადრებს საფეხბურთო მატჩიდან, რომელიც 26 მარტს მიხეილ მესხის სახელობის სტადიონზე შედგა. „განსაკუთრებული საღამო სახლში. მადლობელი ვარ ამ პასუხისმგებლობისთვის. ერთად უფრო ძლიერები ვართ. მადლობა გულშემატკივრობისთვის!” – წერს კვარაცხელია.
„სახლი” „მგზავრების” უახლესი ნამუშევარია, რომელიც 19 თებერვალს გამოვიდა. ჯგუფთან ერთად სიმღერაში მონაწილეობს რეპერი ტაჰა. ნამუშევარს თან ახლავს ვიდეოკლიპიც, რომლის რეჟისორი ზვიდ ციკოლიაა.
რაც შეეხება, საქართველო-ისრაელს შორის გამართულ მატჩს, ის ფრედ, 2:2 დასრულდა. ეს პირველი თამაში იყო, როცა ხვიჩა კვარაცხელია მოედანზე ეროვნული ნაკრების ოფიციალური კაპიტნის რანგში წარდგა მას შემდეგ, რაც გურამ კაშიამ სანაკრებო კარიერის დასრულება დააანონსა. საფეხბურთო ნაკრების ახალ კაპიტნად კი ვილი სანიოლიმ სწორედ კვარაცხელია დაასახელა.
