ანა ჟორდანიას უახლესი ქართული ჯაზ-ალბომის ოფიციალური პრეზენტაცია 7 ივნისს, თბილისურ ეზოში – „ლადო ბაი ვალიკოს“ (L’ado By Valiko Mainsion) ახალ სივრცეში გაიმართება, სადაც მსმენელს შესაძლებლობა ექნება, კომპოზიციები ცოცხლად მოისმინოს. ფართო აუდიტორიისთვის კი ალბომი მუსიკალურ პლატფორმებზე 10 ივნისიდან გახდება ხელმისაწვდომი.
ნამუშევარი მრავალმხრივი მუსიკალური ექსპერიმენტია, რომლის იდეაზე, სირთულეებსა და შემოქმედებით პროცესზე თავად ანა ჟორდანია საუბრობს:
„ჩემი მთავარი მიზანია, ხაზი გავუსვა ჩემს, როგორც ჯაზმენის შემოქმედებით ხედვას და ქართული სიმღერები ისეთი ჯაზური მანერითა და ინსტრუმენტული გადაწყვეტებით შევასრულო, რომ უცხოელმა მსმენელმა მათი მოსმენისას არ თქვას – „რა კარგი ქართული სიმღერაა“, არამედ თქვას – „როგორი მაღალი დონის ჯაზია, როგორ ბუნებრივად უხდება ქართული ენა ჯაზს“.
როგორც თავად არტისტი ამბობს, ალბომი „ლენო რექორდსში“ ჩაიწერა და მასში არაერთი გამორჩეული მუსიკოსი მონაწილეობს. პროექტზე იმუშავეს პაპუნა შარიქაძემ (კლავიში), ლევან დეისაძემ (ბასი) და ზაზა ცერცვაძემ (დასარტყამი ინსტრუმენტები). ორ კომპოზიციაში მონაწილეობს საქსოფონისტი კახი ჯაგაშვილი, ერთ სიმღერაში – ანსამბლი „ჰერიო“ და ჩასაბერი ინსტრუმენტების ჯგუფი, ხოლო კიდევ ერთ კომპოზიციაში – ანა ჟორდანიას აკადემიის მოსწავლეები. ალბომში შესულია ერთი საავტორო სიმღერაც.
„ალბომზე მუშაობა საკმაოდ რთული და ხანგრძლივი პროცესი იყო. ყველაზე მეტად პროგრამის შერჩევა გამიჭირდა. მინდოდა, შემერჩია არა უკვე არაერთხელ შესრულებული და ყველასთვის ცნობილი კომპოზიციები, არამედ შედარებით ნაკლებად ცნობილი ქართული სიმღერები. ამასთან, მინდოდა, თითოეული ტრეკი ერთმანეთისგან განსხვავებული და საკუთარი სათქმელის მქონე ყოფილიყო. სწორედ ეს ძიება აღმოჩნდა მთელი პროცესის ყველაზე რთული ნაწილი. მეორე მხრივ, უდიდესი ბედნიერებაა ასეთ მაღალი დონის მუსიკოსებთან თანამშრომლობა. მათ ძალიან სწრაფად აითვისეს მასალა და ზუსტად ისე შეასრულეს, როგორც მე ვხედავდი.”
საგულისხმოა ისიც, რომ აღნიშნული რელიზი (Volume 1) მხოლოდ დასაწყისია იმ დიდი მუსიკალური ტრილოგიისა, რომელსაც ანა ჟორდანია მსმენელს მომავალში ჰპირდება. დაელოდეთ ანა ჟორდანიას ქართული ჯაზ-ალბომის გამოსვლას, სადაც ქართული ენისა და ნამდვილი ჯაზის ორიგინალური სინთეზი ქართულ მელოდიებს ახალი პერსპექტივით აცოცხლებს.
