გრემიზე ნომინირებული გიტარისტისა და ბასისტის, ტალ მაშიახის ახალი სინგლი Ajaruli 5 ივნისს გამოვიდა. კომპოზიცია მისი მომავალი ალბომის, Who’s Around?-ის ნაწილია, რომელიც 26 ივნისს Anzic Records-ის ლეიბლის საშუალებით გამოიცემა. ეს კოლაბორაცია კულტურული დიალოგის შედეგია, რომელიც ტალ მაშიახის საქართველოში მოგზაურობითა და ქართველ მუსიკოს ხონძისთან მეგობრობით არის შთაგონებული.
კომპოზიცია ტალ მაშიახის საქართველოში სტუმრობის დროს, უშუალოდ ხონძის გარემოცვაში ყოფნისას დაიწერა. პირველადი ვერსიის მოსმენის შემდეგ ხონძიმ შენიშნა, რომ მუსიკაში აშკარად იგრძნობოდა აჭარული რიტმების გავლენა. სწორედ ამის შემდეგ დაწერა ტექსტი, რომელიც ტრადიციული ქართული ხალხური სიმღერის თავისუფალ ინტერპრეტაციას წარმოადგენს. ქართულ ენაზე შესრულებული Ajaruli თანამედროვე ჯაზურ ჟღერადობასა და ქართული მუსიკალური ტრადიციის ელემენტებს აერთიანებს.
ტალ მაშიახი კომპოზიციაში გიტარასა და კონტრაბასზე უკრავს, ხონძი კი ვოკალსა და საქსოფონს ასრულებს. ჩანაწერში ასევე მონაწილეობენ ოფრი ნეჰემია (დრამი) და ელიბო იმერლიშვილი (დოლი).
„ხონძის გაცნობიდან დაახლოებით ერთი კვირის შემდეგ ჩვენი პირველი კონცერტი გაიმართა, ორივესთვის ეს პირველი გამოსვლა იყო ნიუ-იორკში. მას შემდეგ ჩვენ შორის ღრმა მუსიკალური და პირადი მეგობრობა ჩამოყალიბდა. ხონძი ჩემი ბენდის, TM Street Band-ის წევრია, მე კი მისი ბენდის წევრი ვარ და ჩვენი მუდმივი თანამშრომლობა ორივესთვის შთაგონების წყაროდ რჩება.
საბოლოოდ საქართველოში ჩამოვფრინდი, რათა სამი კვირა მასთან, მის ოჯახსა და მეგობრებთან ერთად გამეტარებინა. სწორედ აქ დავწერე კომპოზიცია Ajaruli.”
მოისმინეთ Ajaruli, რომელიც ქართველი მსმენელისთვის ნაცნობ მელოდიებს ახალ კონტექსტში აცოცხლებს და საერთაშორისო აუდიტორიას ქართული ენისა და ფოლკლორის სრულიად განსხვავებულ გამოცდილებას სთავაზობს.
