უკვე ცნობილია, რომ „მგზავრების” ბოლო ნამუშევარი „სახლი”, რომელშიც რეპერი ტაჰაც მონაწილეობს, ხვიჩა კვარაცხელიას ერთ-ერთ საყვარელ სიმღერად იქცა. ჩემპიონთა ლიგის მეორე გამარჯვების შემდეგ ქართველ ფეხბურთელს „პარკ დე პრენსზე” სწორედ ამ სიმღერის ფონზე დახვდნენ. მანამდე კი კვარაცხელიამ კომპოზიცია სოციალურ ქსელში გამოქვეყნებულ პოსტში გამოიყენა.
ამჯერად კი ფეხბურთელმა მისი შესრულება გადაწყვიტა და ეროვნული ნაკრების წვეულებაზე „სახლი” ტაჰასთან ერთად იმღერა. ვიდეოში, რომელიც ინტერნეტში ვირუსულად გავრცელდა, ჩანს, რომ ხვიჩა კვარაცხელიამ ტაჰას პარტია ზეპირად იცის და მისამღერის შემდეგ მასთან ერთად რეპავს. საღამოზე ასევე გაჟღერდა ტაჰას მიერ 2024 წლის ევროპის ჩემპიონატზე ნაკრებისთვის შექმნილი ოფიციალური სიმღერა „ჩვენ აქ ვართ” და Mamaflex-ის Lady-ს ვერსია.
ეროვნული ნაკრების წვეულება სანაკრებო პაუზის ორ ამხანაგურ მატჩს მოჰყვა. საქართველოს ნაკრებმა რუმინეთთან ანგარიში ფრედ (1:1), ხოლო ბაჰრეინთან მოგებით (2:0) დაასრულა. 5 ივნისის მატჩზე ხვიჩა კვარაცხელია უკვე ოფიციალურად ნაკრების ახალი კაპიტნის რანგში წარდგა მას შემდეგ, რაც 2 ივნისს, საქართველო-რუმინეთის თამაშზე, გურამ კაშიამ გამოსამშვიდობებელი თამაში ჩაატარა.
