მადონას CONFESSIONS II –The Film-ის Tribeca Festival-ზე პრემიერის შემდეგ პროექტი ახლა ყველასთვის ხელმისაწვდომია. 10-წუთიანი ფილმი უკვე „იუთუბზე” დევს და მაყურებელს სთავაზობს კინემატოგრაფიულ გამოცდილებას, რომელიც თან ახლავს პოპის დედოფლის ალბომ Confessions II-ს. ალბომი 3 ივლისს გამოდის.
ფილმი ასახავს ღამის კლუბში ცეკვისას განცდილ სპონტანურობას, სადაც ყველაფერი შეიძლება მოხდეს. სიუჟეტი ექვსი სიმღერის მეშვეობით ვითარდება და თითოეული მათგანი ამბის განსხვავებულ თავს წარმოადგენს. ეს სიმღერებია: I Feel So Free, Good for the Soul, One Step Away, Bring Your Love, Danceteria და Read My Lips.
I Feel So Free ალბომის პირველი სინგლია, რომელიც აპრილში გამოვიდა და მომღერალი „ბილბორდის” ოთხ ჩარტში დააბრუნა.
ვიდეო მოიცავს ორ ძირითად კოლაბორაციას – საბრინა კარპენტერი სიმღერაში Bring Your Love და კოლუმბიელი არტისტი Feid სიმღერაში Read My Lips – და ნაცნობ სახეებს, რომლებიც მადონას ამ სიზმრისეულ მოგზაურობაში ახლავს თან. ესენი არიან პოპკულტურის ცნობილი და ყველასთვის საყვარელი სახეები: კეიტ მოსი, დები მაზარი, ჯულია გარნერი, ბენედიქტ კამბერბეჩი. ბოლო სცენაში ასევე ჩნდება მომღერლის 29 წლის ქალიშვილი ლურდეს ლეონიც, რომელიც კამერაში რამდენიმე სიტყვას ამბობს.
ფილმმა Tribeca Festival-ზე ფეხზე მდგომი ოვაციები დაიმსახურა.
ნახეთ CONFESSIONS II – The Film:
