ელისონ უანდერლენდს შვილიშვილებისთვის მოსაყოლი ისტორიები ნამდვილად არ აკლია. ავსტრალიელმა ვარსკვლავმა საკუთარი თავი ისტორიის წიგნებში უკვე ჩაწერა, როცა 2018 წელს კოაჩელას ფესტივალის ჰედლაინერად წარდგა, რითაც ამ სტატუსის მქონე პირველი ქალი დიჯეი გახდა.
არტისტი ალბათ კიდე უფრო ამაყია იმით, რომ ის შვიდჯერ იყო საკუთარი შოუს, Temple of Wonderland-ის ჰედლაინერი. მისი კარიერა ასევე მოიცავს ისეთ ფესტივალებზე გამოსვლას, როგორებიცაა: Lollapalooza, Tomorrowland, Electric Daisy Carnival, Ultra Music Festival და სხვები.
სიდნეიში დაბადებულ არტისტს მხოლოდ აშშ-ში 800 000-ზე მეტი ბილეთი აქვს გაყიდული. მისი მუსიკის სტრიმებმა კი მსოფლიო მასშტაბით 1.1 მილიარდს მიაღწია.
25 ივნისის საღამოს კი მისი კარიერის ერთ-ერთი ყველაზე მნიშვნელოვანი მომენტი დადგება: ის ფეხბურთის მსოფლიო ჩემპიონატზე მიიწვიეს, რათა ავსტრალია-პარაგვაის თამაშამდე ბურთი მოედანზე სწორედ მან გაიტანოს.
„ღმერთო ჩემო, ახლახან ‘ადიდასმა’ მომმართა, რომ ავსტრალია-პარაგვაის მატჩზე მოედანზე ბურთი მე გავიტანო,” – დაწერა მუსიკოსმა სოციალურ ქსელში. „ყველას ხელს დაგიქნევთ ტელევიზორიდან. წარმატება მისურვეთ.”
გახარებულმა უანდერლენდმა სტუდიიდან რამდენიმე ფოტოც გააზიარა. ფოტოებში მას ავსტრალიის ეროვნული ფერების – მწვანე და ოქროსფერი – „ადიდასის” შარვალი აცვია. ერთ-ერთი ფოტო, როგორც ჩანს, სწორედ იმ მომენტშია გადაღებული, როცა არტისტი უნიკალური შეთავაზების მეილს კითხულობს.
ავსტრალიელი ფეხბურთელები იმედოვნებენ, რომ უანდერლენდი მათ იღბალს მოუტანს. ჯგუფიდან გასასვლელად ნაკრებს პარაგვაისთან მოგება ან ფრე სჭირდება.
შეთავაზება იდეალურ დროს დაემთხვა – ამჟამად არტისტი ტურნეს აშშ-ში მართავს. ტურნეს ფინალური კონცერტი 27 ივნისს ლას-ვეგასში გაიმართება, რის შემდეგაც კონცერტების სერია დიდ ბრიტანეთსა და ევროპაში გაგრძელდება.
ტურნემდე უანდერლენდი ბილბორდს ესაუბრა.
„მე პერფექციონისტი ვარ. ერთხელ ვიღაცამ მითხრა: შეიძლება ყველას უთხრა, თუ რამხელა ძალისხმევა ჩადე ამა თუ იმ საქმეში, მაგრამ დღის ბოლოს, ერთადერთი ადამიანი, რომელმაც ზუსტად იცის, გააკეთე თუ არა შენი მაქსიმუმი, ეს მხოლოდ შენ ხარ. ეს აზრი სულ ჩემთან დარჩა და ყოველთვის გონებაში მაქვს, როცა რაიმეს ვაკეთებ. ვფიქრობ, ამიტომაც ვთხოვ საკუთარ თავს ამდენს. ამაზე მუდმივად ვფიქრობ.”
ელისონ უანდერლენდის ბოლო ალბომი 2025 წლის დეკემბერში გამოვიდა.
