Madonna და Charli XCX პარიზში გამართულ Saint Laurent Men’s Fashion Show-ზე ერთმანეთის გვერდით ისხდნენ. ინტერნეტში გავრცელებულ კადრებში ჩანს, როგორ ეწევიან და საუბრობენ Charli და Madonna სხვა ვარსკვლავებთან ერთად, რომლებიც ფრანგული მოდის სახლის მხარდასაჭერად მოვიდნენ. მათ შორის იყვნენ მსახიობები კონორ სტორი და დები მეიზარი. პოპვარსკვლავბი ჩვენების დაწყებამდე ფოტოგრაფებისთვის ერთადაც პოზირებდნენ.
აღსანიშნავია, რომ ორივე ვარსკვლავმა წითელი მაქმანებიანი კაბა მოირგო, თუმცა Madonna-ს არჩევანი შედარებით მუქ ტონალობაზე შეჩერდა. პოპის დედოფალს, რომლის ნანატრი ალბომი Confessions II 3 ივლისს გამოდის, შენობაშიც კი სათვალე ეკეთა, Charli-მ კი პირიქით, თავის საფირმო მუქ სათვალეზე უარი თქვა.
მაისში სოციალურ ქსელებში გავრცელდა ჭორები, რომ Madonna-სა და Charli XCX-ს ურთიერთობა დაეძაბათ. ამის მიზეზი Charli XCX-ის სიმღერა Rock Music გახდა, რომელშიც ის ამბობს, რომ „საცეკვაო მოედანი მკვდარია“. ამის საპასუხოდ Madonna-მ ინსტაგრამზე გზავნილი გამოაქვეყნა:
„თუ შენი საცეკვაო მოედანი მკვდარია, შესაძლოა, არასწორ მუსიკას უკრავ.“
მიუხედავად ამ სპეკულაციებისა, Charli XCX-ს წარსულში არაერთხელ გამოუხატავს აღფრთოვანება Madonna-ს მიმართ. წელს, პროექტ The Moment-ის პრომო კამპანიის ფარგლებში, მან განსაკუთრებული ყურადღება გაამახვილა პოპ-დედოფლის 1991 წლის დოკუმენტურ ფილმზე Truth or Dare.
„ძალიან მიყვარს Truth or Dare. Madonna საოცარია. ფილმში ქორეოგრაფიაც შესანიშნავია და, საერთოდაც, ის უბრალოდ უნიკალურია,“ – აღნიშნა Charli XCX-მა.
მუსიკალური სიახლეების მხრივ, Charli XCX ახალი ალბომის, Music, Fashion, Film-ის გამოსაცემად ემზადება. ჩანაწერი 24 ივლისს გამოვა.
18 ივნისს გამოქვეყნებულ ინტერვიუში, რომელიც მან Rolling Stone-ს მისცა, ბრიტანელმა პოპვარსკვლავმა ფსიქიკურ ჯანმრთელობაზე და ბოლო პერიოდში არსებულ სირთულეებზე ისაუბრა. მისი თქმით, ამ ეტაპზე ცხოვრების ყველაზე მძიმე ემოციურ მდგომარეობას გადის.
„სოციალურ ქსელებს უკვე იმდენად ხშირად აღარ ვამოწმებ. ჩემი გონებრივი მდგომარეობისთვის ასე უკეთესია. ვიცი, ბევრმა შეიძლება არ დაიჯეროს, რადგან წარსულში ძალიან აქტიურად ვიყავი ონლაინ სივრცეში,“- აღნიშნა Charli XCX-მა.
მისივე თქმით, ბოლო პერიოდში ფსიქიკურ ჯანმრთელობასთან დაკავშირებული პრობლემები იმდენად გამწვავდა, რომ თავს ცხოვრების მანძილზე ყველაზე რთულ მდგომარეობაში გრძნობს.
„თუ გულწრფელი ვიქნები, ახლა ფსიქიკურად ყველაზე მძიმე ეტაპზე ვარ, რაც კი ოდესმე მქონია,“ – აღნიშნა არტისტმა.
