ნოდარიკო ხუციშვილმა მსმენელს ახალი სიმღერა „ნაყინი“ წარუდგინა. ტრეკი ზაფხულის განწყობას, პირველ სიმპათიებსა და იმ თავისუფალ, მსუბუქ ემოციებს ასახავს, რომლებიც ხშირად წლის ყველაზე თბილ სეზონს უკავშირდება.
სიმღერის ტექსტისა და მელოდიის ავტორი თავად არტისტია, მუსიკალურ პროდაქშენზე ლუკა ქიტიაშვილმა და ნიკალა ზუბიაშვილმა იმუშავეს, მიქსინგსა და მასტერინგზე კი პაპუნა ალიბეგაშვილმა იზრუნა. ვოკალურ ნაწილს, ნოდარიკოსთან ერთად, ლიკუნა თუთისანი, ნიკალა ზუბიაშვილი და ლუკა ქიტიაშვილი ასრულებენ. პროექტი Break Records-ის ფარგლებში განხორციელდა, ხოლო აღმასრულებელი პროდიუსერი თავად ნოდარიკო ხუციშვილია.
ნოდარიკო ხუციშვილი – მუსიკოსი:
„ამ სიმღერის იდეა რამდენიმე წლის წინ, ერთ-ერთ ჯემ სესიაზე დაიბადა, რაღაც მელოდია ლუპზე უკრავდა და ხალხი როცა ცეკვავდა, ეს მონაკვეთი წავიმღერე – შენს ღიმილთან ერთად მარტივია ცეკვა. ეს მელოდია და განწყობა დიდხანს გამყვა.
წელს, ზაფხულში, ვიფიქრე, რომ ამ იდეას გაგრძელება სჭირდებოდა. Break Records-ში ლუკა ქიტიაშვილთან და ნიკალა ზუბიაშვილთან ერთად დავიწყეთ მუშაობა. ჯერ მუსიკალური ფონი შევქმენით, შემდეგ კი ტექსტიც ნელ-ნელა ჩამოყალიბდა.
სიმღერა ზაფხულის იმ განსაკუთრებულ ემოციას ასახავს, როცა ორ ადამიანს შორის ყველაფერი მარტივად და ბუნებრივად იწყება – არის ფლირტი, სიმსუბუქე და კარგი განწყობა. ტექსტში ერთ ადგილას ვახსენებ ფრაზას – „შოკოლადის ნაყინით იდგა პლაჟზე“, რომ ვიფიქრე რა დამერქმია, ამაზე წავედი.
ნაყინი ხომ ყველასთვის ზაფხულის, ბავშვობის, ფერადი მოგონებებისა და ბედნიერი განწყობის სიმბოლოა. ამიტომაც ძალიან მოუხდა ეს სახელი ამ ტრეკს.“
არტისტი ვიდეოკლიპის შექმნის პროცესსაც იხსენებს და ამბობს, რომ პროექტი მთლიანად მეგობრებისა და თანამოაზრეების თანამშრომლობის შედეგია.
„კლიპი ლაშა ჩაგელიშვილთან ერთად გადავიღეთ. მონტაჟსა და პოსტპროდაქშენში თიკო ნოზაძე, ლიზა კოკელაძე და დათო ლოლაძე ჩაერთნენ. ყველამ თავისი წვლილი შეიტანა, რომ ჩემი მელოდია და ტექსტი ვიზუალურადაც გაფერადებულიყო. საბოლოოდ მივიღეთ ძალიან საზაფხულო, მხიარული და ენერგიული ნამუშევარი.“
„ნაყინი“ უკვე ხელმისაწვდომია მსმენელისთვის და, როგორც თავად ნოდარიკო ხუციშვილი ამბობს, ეს არის სიმღერა, რომელიც ზაფხულის თავისუფალ და პოზიტიურ განწყობას ეძღვნება.
მოისმინეთ ნოდარიკო ხუციშვილის სიმღერა – „ნაყინი”
