დაჩი ბაბუნაშვილმა ახალი სინგლი გამოსცა, სახელწოდებით CHAOS. სიმღერა სოციალურ ხასიათს ატარებს და ავტორის ერთგვარი პროტესტია დღეს არსებულ, მისი შეფასებით, ქაოსურ მდგომარეობაზე.
„სიმღერა ქაოსურ უსამართლობაზეა, სადაც ყველა ასპექტში არასტაბილურობა და განუკითხაობაა,” – ამბობს არტისტი. „ამ დროს მარტო რჩები, ზიზღის შეგრძნება გიჩნდება და არ იცი, როგორ მოიქცე. მაგრამ იცი ის, რომ მნიშვნელოვანია საკუთარ თავთან სინდისის შენარჩუნება.”
CHAOS ხელმისაწვდომია მუსიკალურ პლატფორმებზე. სიმღერას თან ახლავს ვიდეოკლიპიც. სოციალურ ქსელში კი ავტორი კლიპის მოკლე მონაკვეთს, ე.წ. შორტს აქვეყნებს, რომელშიც მუსიკოსი კედელზე საღებავით წერს: In Tyrannos (ტირანიის წინააღმდეგ).
დაჩი ბაბუნაშვილი ახალგაზრდა არტისტია, რომლის შემოქმედებაც პოპის, როკის, ჰიპ-ჰოპისა და R&B-ის მიმდინარეობებს აერთიანებს. მისი მუსიკა ემოციურობით გამოირჩევა. არტისტის ნამუშევრები ხშირად ეხება სოციალურ თემებს, სამშობლოს სიყვარულს, სიხარულსა და ტკივილს.
