ქართველი მუსიკოსების, Irakli Gabriel-ისა და Anana Kaye-ს მიერ ამერიკაში დაფუძნებული ინდი-დუო Anana Kaye ახალ სინგლსა და ვიდეორგოლს Cross the Water აქვეყნებს. დუეტი კიდევ ერთხელ უბრუნდება იმ თემებს, რომლებიც მათ შემოქმედებაში ხშირად იკვეთება: იდენტობა, სახლი, მეხსიერება და ის გზა, რომელსაც ადამიანი საკუთარი ადგილის საპოვნელად გადის.
Cross the Water ადამიანის შინაგანი და ფიზიკური ტრანსფორმაციის ისტორიაა, ყველა იმ სირთულით, რომელიც დროსა და სივრცეში დამკვიდრების მცდელობას ახლავს თან.
Irakli Gabriel – მუსიკოსი
„Cross the Water კინემატოგრაფიული მედიტაციაა ემიგრაციაზე, კუთვნილების განცდაზე და იმ გამბედაობაზე, რომელიც საჭიროა უცნობისკენ პირველი ნაბიჯის გადასადგმელად. მიუხედავად იმისა, რომ სიმღერა საზღვრების გადაკვეთაზე მოგვითხრობს, „წყლის გადაკვეთა“ აქ უნივერსალურ მეტაფორად იქცევა – იმ რწმენის, რომელსაც ადამიანის ცხოვრების შეცვლა შეუძლია.
ეს არის ერთდროულად ძალიან პირადი მოგზაურობა და პატივისცემა ყველა იმ ადამიანის მიმართ, ვისაც ოდესმე დაუტოვებია ერთი ნაპირი, რათა მეორე ეპოვა.”
ბოლო პერიოდში Anana Kaye ქართულ ფოლკლორულ ელემენტებს, ამერიკულ ფოლკსა და ინდი-როკის ესთეტიკას ერთმანეთთან ბუნებრივად აზავებს. მათი შემოქმედება ხშირად მოგზაურობის, წარსული აღქმებისა და ადამიანური კავშირების შესახებ გვიყვება, ხოლო Cross the Water ამ მუსიკალური ხაზის ერთ-ერთი ყველაზე ინტიმური რეტროსპექტივაა.
Cross the Water სწორედ იმ გზის საუნდტრეკია, რომელსაც ადამიანი შეუცნობელისკენ მიჰყავს და შესაძლოა, საბოლოოდ საკუთარ თავთანაც აბრუნებს.
მოუსმინეთ Anana Kaye-ს ახალ კომპოზიციას: Cross the Water
