ლიამ გალაგერმა ფიფას მსოფლიო ჩემპიონატის პირველი Halftime Show მკაცრად შეაფასა. „ოაზისის” წევრი სოციალურ ქსელში მუნდიალის ფინალში გამართულ მუსიკალურ შოუს გამოეხმაურა, რომელშიც მადონა, BTS, ჯასტინ ბიბერი, შაკირა, Burna Boy, გუსტავო დუდამელი, კრის მარტინი, PS22 Chorus და „მაპეტები” მონაწილეობდნენ.
„ეს ცუდ მოგზაურობას ჰგავდა,” – დაწერა გალაგერმა. შემდეგ კი ახალი პოსტი გამოაქვეყნა. „კარგია, რომ სულიერად მზად ვიყავი, თორემ ამ შოუს შეიძლება მოთმინებიდან გამოვეყვანე.”
11-წუთიანი კონცერტი, კრის მარტინის კურატორობით, პირველი მუსიკალური შოუ იყო მუნდიალის ისტორიაში, რომელიც ფინალური მატჩის ტაიმებს შორის გაიმართა. შოუ გაიხსნა მადონას Billboard Hot 100-ის ლიდერი სიმღერით Music, რის შემდეგაც სცენაზე BTS, ბიბერი, შაკირა, Burna Boy და სხვა შემსრულებლები წარდგნენ.
შაკირამ და Burna Boy-მ Dai Dai შეასრულეს – 2026 წლის მსოფლიო ჩემპიონატის ოფიციალური სიმღერა და Billboard Global 200-ის ამჟამინდელი ლიდერი. BTS-მა Dynamite, ხოლო ბიბერმა Everything Hallelujah-ს აკუსტიკური ვერსია იმღერა. გუსტავო დუდამელი დირიჟორობდა ნიუ-იორკის ფილარმონიული ორკესტრისა და სიმონ ბოლივარის სიმფონიური ორკესტრის მუსიკოსებს, რომლებმაც The White Stripes-ის Seven Nation Army დაუკრეს. შოუს დასასრულს მოედანზე PS22 Chorus, კრის მარტინი და „მაპეტები” წარდგნენ. მათ სხვა შემსრულებლებიც შეუერთდნენ.
შოუ ერთ-ერთი ყველაზე მუსიკალურად დატვირთული მომენტი იყო მსოფლიო ჩემპიონატის ფინალების ისტორიაში. ამ ნაბიჯით ფიფა იმ გასართობ მოდელს დაუახლოვდა, რომელიც, დიდი ხანია, Super Bowl-თან ასოცირდება, სადაც ფინალური მატჩის ტაიმებს შორის გამართული მუსიკალური შოუ ტრანსლაციის განუყოფელი ნაწილი და ერთ-ერთი მთავარი მოვლენაა.
გალაგერის რეაქცია მოჰყვა „ოაზისის” სტადიონის მასშტაბებზე დაბრუნებას OASIS LIVE ’25 tour-ის ფარგლებში, რომელიც მოიცავდა კონცერტებს დიდ ბრიტანეთში, ირლანდიაში, ჩრდილოეთ ამერიკაში, მექსიკაში, აზიაში, ავსტრალიასა და სამხრეთ ამერიკაში. გარდა ამისა, ბენდის სიმღერები წლების განმავლობაში მჭიდროდ დაუკავშირდა საფეხბურთო კულტურას. Wonderwall და Don’t Look Back in Anger გასცდა უბრალოდ როკმუსიკის ფარგლებს და სტადიონებზე გულშემატკივრებიის საყვარელ სიმღერებად იქცა.
