The Black Eyed Peas-ის 2005 წელს გამოცემული სიმღერის ოფიციალურმა მუსიკალურმა ვიდეომ პლატფორმაზე მილიარდ ნახვას გადააჭარბა.
სიმღერა ჰიპ-ჰოპ ჯგუფის მეოთხე სტუდიურ ალბომ Monkey Business-შია შესული. ეს The Black Eyed Peas-ის მესამე ვიდეოკლიპია, რომელმაც YouTube-ზე ამ ნიშნულს მიაღწია. მანამდე ამავე კატეგორიასი მოხვდნენ ჯგუფის ვიდეოები Where Is the Love? და RITMO, რომელიც J Balvin-თან ერთად Bad Boys for Life-ის საუნდტრეკისთვის ჩაიწერა.
სიმღერის ავტორი will.i.am-ია. My Humps-ში გამოყენებულია Sexual Harassment-ის 1983 წლის სინგლის I Need a Freak სემპლები, რომლის ავტორიც ლინ ტოლივერია.
საინტერესოა, რომ თავდაპირველად My Humps ჯგუფ The Pussycat Dolls-ისთვის იყო განკუთვნილი, თუმცა საბოლოოდ სიმღერა The Black Eyed Peas-მა შეასრულა. კომპოზიციაში მთავარ ვოკალურ პარტიებს Fergie და will.i.am ასრულებენ.
My Humps The Black Eyed Peas-ის მეორე სინგლია, რომელიც Billboard Hot 100-ის საუკეთესო სამეულში მოხვდა. მანამდე იმავე შედეგს ჯგუფის ჰიტმა Don’t Phunk with My Heart მიაღწია. კომპოზიციამ ასევე გრემის ჯილდო მოიპოვა ნომინაციაში – „დუეტის ან ჯგუფის საუკეთესო პოპშესრულებისთვის“.
მიუხედავად უდიდესი კომერციული წარმატებისა, My Humps კრიტიკოსებში არაერთგვაროვან შეფასებებს იწვევდა. განსაკუთრებით სიმღერის ტექსტში არაერთხელ გამეორებული ფრაზა my lovely lady lumps, რომელიც მუსიკალურ მედიასა და კრიტიკოსებს შორის ფართო განხილვის საგნად იქცა და არაერთი უარყოფითი შეფასებაც მოჰყვა.
მაგალითად, გამოცემა Slate-ში გამოქვეყნებულ სტატიაში, სათაურით Notes on Humps: A Song So Awful It Hurts the Mind, ჟურნალისტი ჰუა ჰსუ წერდა:
„სწორედ ეს ხდის My Humps-ს პოპმუსიკის ერთ-ერთ ყველაზე ამოუხსნელ ფენომენად. ის უბრალოდ „იმდენად ცუდიც არ არის, რომ კარგი იყოს, ის საშინლად ცუდია.“
კრიტიკოსების უარყოფითი შეფასებების მიუხედავად, My Humps მსმენელისთვის ნამდვილ ჰიტად იქცა.
ვიდეოკლიპის რეჟისორები ფატიმა რობინსონი და მალიკ ჰასან საიედი არიან, კლიპში კი Fergie მოცეკვავეებთან ერთად ძვირადღირებული საჩუქრების ფონზე ცეკვავს, რომლებიც, კლიპის სიუჟეტის მიხედვით, თაყვანისმცემლებმა მიართვეს.
აღსანიშნავია, რომ 2006 წელს ვიდეომ MTV Video Music Awards-ზე საუკეთესო ჰიპ-ჰოპ ვიდეოს ჯილდოც მოიპოვა.
მიმდინარე წლის მაისში The Black Eyed Peas-ის წევრები 2018 წელს Fergie-ის ჯგუფიდან წასვლის შემდეგ სცენაზე პირველად გაერთიანდნენ. ისინი American Music Awards-ის ცერემონიაზე, MGM Grand Garden Arena-ში, მოულოდნელად გამოჩნდნენ და სიმღერისთვის Rock That Body ჯილდოც მიიღეს.
ნახეთ The Black Eyed Peas-ის ჰიტის My Humps ოფიციალური მუსიკალური ვიდეო.
