Charli xcx-ის მომდევნო ერა უკვე დადგა. 24 ივლისს ბრიტანელმა პოპვარსკვლავმა ახალი ალბომი Music, Fashion, Film გამოსცა. ჩანაწერი მოჰყვა „ქარიშხლიანი უღელტეხილის” საუნდტრეკ ალბომს, რომელიც თებერვალში გამოვიდა.
ახალ ალბომში ჯამში 11 სიმღერა შედის, მათ შორის ოთხი მანამდე გამოცემული სინგლი: Camera, SS26, Rock Music და Wink Wink.
ალბომის დასკვნითი სიმღერა No One Lasts Forever პროექტის ერთადერეთ სტუმარს მოიცავს – მასში რეჟისორ დევიდ კრონენბერგის საუბარია ჩაწერილი. როგორც ჩარლიმ აღნიშნა, მას ტორონტოში პირადად ესტუმრა.
„ალბათ ერთი საათი ვისაუბრეთ. შემდეგ კი ის მონაკვეთები ავარჩიეთ, რომლებიც ყველაზე ახლოს იყო სიმღერასთან. მთელი საუბარი ძალიან საინტერესოა. ის საინტერესო ადამიანია, ჭკვიანი და კეთილშობილი. შემიძლია, უსასრულოდ ვუსმინო მას. ვფიქრობ, ძალიან საინტერესო პერსპექტივა აქვს მემკვიდრეობაზე, ხელოვნებასა და ხელოვანებზე,” – აღნიშნავს ჩარლი.
მომღერალმა ფანებს ალბომის შესახებ პირველი წარმოდგენა ივლისში შეუქმნა, როცა ნიუ-იორკსა და ლონდონში გამართულ მცირე შოუებზე ჩანაწერიდან რამდენიმე სიმღერა შეასრულა.
Music, Fashion, Film-ის გამოცემის შემდეგ ჩარლი ჩრდილოამერიკულ ტურნეში გაემგზავრება. ტურნე 11 სექტემბერს ფილადელფიაში დაიწყება, შემდეგი გაჩერებები კი ბრუკლინი, ტორონტო, ლოს-ანჯელესი და ლას-ვეგასი იქნება.
Charli xcx-მა პოპკულტურის ცენტრში კიდევ უფრო მტკიცედ დაიმკვიდრა ადგილი 2024 წლის ალბომით Brat, რომელმაც მას Billboard 200-ის მესამე ადგილი და სამი გრემის ჯილდო მოუტანა. ჩანაწერი ამ დრომდე რჩება ჩარტებში მუსიკოსის ყველაზე წარმატებულ პროექტად.
