თეთრი სახლი Bad Bunny-სა და დრეიკის სიმღერებს დონალდ ტრამპის დეპორტაციის კამპანიის პოპულარიზაციისთვის იყენებს. ამ ნაბიჯმა ფანების დიდი კრიტიკა დაიმსახურა და არტისტების მუსიკის გამოყენებასთან დაკავშირებით კითხვები წარმოშვა.
ვიდეოში, რომელიც თეთრი სახლის ტიკტოკის ანგარიშზე 30 ივლისს გამოქვეყნდა, გამოყენებულია Bad Bunny-ს La Mudanza, რომელიც 2025 წელს Billboard Hot 100-ში 51-ე ადგილით შევიდა. კლიპი იწყება ტრამპის კადრებით, რასაც მოსდევს საიმიგრაციო სამსახურის მიერ არალეგალი ქალებისა და კაცების დაკავების ვიდეომასალა. ეკრანზე კი ჩნდება სიმღერის ტექსტის „აპლოდისმენტები დედას და მამას, რადგან მათ მართლაც კარგად გაართვეს თავი” შეცვლილი ვერსია: „აპლოდისმენტები დონალდ ტრამპს, რადგან მან ნამდვილად გაართვა თავი.” ვიდეოს აღწერაში კი ვკითხულობთ: „ჩვენ ამერიკას ისევ დიდებულს ვხდით.”
ვიდეოს, რომელმაც პრეზიდენტის მხარდამჭერების მოწონება დაიმსახურა, გამოქვეყნებისთანავე მოჰყვა მწავავე კრიტიკა კომენტარებში. ზოგიერთი მომხმარებელი Bad Bunny-ს სიმღერის გამოყენებას, სხვები კი ტრამპის საიმიგრაციო პოლიტიკას აკრიტიკებენ და წერენ: „არავინაა არალეგალი მოპარულ მიწაზე.”
მომდევნო დღეს კი თეთრმა სახლმა დეპორტაციის კიდევ ერთი მუსიკალური ვიდეო გამოაქვეყნა, ამჯერად დრეიკის Hoe Phase-ის ფონზე, რომელიც Billboard 200-ის მესამე ადგილოსანი ალბომის, MADE OF HONOUR-ის გამხსნელი სიმღერაა. ვიდეოში ჩანს ვერტმფრენები, თვითმფრინავები, აშშ-მექსიკის საზღვარი და საიმიგრაციო სამსახურის მიერ ადამიანების დაკავების კადრები. აღწერაში კი ვკითხულობთ: „ნება მოგვეცით, შეგახსენოთ, რომ თუ აქ არალეგალურად იმყოფებით, სახლში მიდიხართ.” ეკრანზე კი წერია სიმღერის ტექსტი: „დაგავიწყდა შენი სახლი?”
წინა ვიდეოს მსგავსად, ამ პოსტსაც დიდი კრიტიკა მოჰყვა პრეზიდენტის მისამართით. „იმ ფაილების შესახებ ხომ არ დაგავიწყდა?” – წერენ კომენტარებში ეპშტეინის ფაილებზე.
ტრამპი განაგრძობს საბუთების არმქონე პირების აშშ-დან გაძევებას. 2025 წელს თეთრ სახლში დაბრუნების შემდეგ მან საიმიგრაციო კანონების აღსრულების ღონისძიებები გააფართოვა და მასობრივი დეპორტაციის კამპანია წამოიწყო, რომლის ფარგლებშიც საიმიგრაციო სამსახურის მიერ განხორციელებული დაკავებები და დეპორტაციები მისი შიდა პოლიტიკის ერთ-ერთ განმსაზღვრელ ნაწილად იქცა.
Bad Bunny, რომელიც წარმოშობით პუერტო-რიკოდანაა (აშშ-ის ტერიტორია), ხმამაღლა აკრიტიკებს საიმიგრაციო სამსახურის ოპერაციებსა და ტრამპის ადმინისტრაციას. 2026 წლის გრემის დაჯილდოებაზე სიტყვით გამოსვლისას მან თქვა: „ჩვენ არ ვართ ველურები, არ ვართ ცხოველები, არ ვართ უცხოპლანეტელები. ჩვენ ადამიანები ვართ და ჩვენ ამერიკელები ვართ.”
დრეიკი კი, რომელიც ტორონტოდანაა, წარსულში ასევე აკრიტიკებდა ტრამპს. 2017 წლის კონცერტზე ლონდონში მან პრეზიდენტზე საკუთარი მოსაზრება გააზიარა: „ყოველდღე, როცა ვიღვიძებ, ვხედავ იმ სისულელეებს, რაც მსოფლიოში ხდება – რომ ადამიანები ცდილობენ, გაგვხლიჩონ და ერთმანეთს დაგვაპირისპირონ. ჩემი ყველაზე საამაყო მომენტი კი ამ დარბაზში გადმოხედვაა, სადაც სხვადასხვა რასისა და წარმომავლობის ადამიანები ხართ.”
