ბრიტნი სპირსი ბიონსეს ვერ ელევა. ინსტაგრამზე გამოქვეყნებულ პოსტში პოპის პრინცესა ვიდეოებს აზიარებს, სადაც ბიონსეს მუსიკაზე ცეკვავს და ამბობს, რომ მისი მოსმენა არ ჰბეზრდება.
„ძალიან უცნაურია, რომ ამ ბოლო დროს მხოლოდ ბიონსეს ბოლო ალბომს ვუსმენ,” – წერს სპირსი და გულისხმობს მის 2024 წლის Billboard 200-ის ლიდერ Cowboy Carter-ს. „უზომოდ მიყვარს, მაგრამ, ჯანდაბა, არ ვიცი, რატომ ვუბრუნდები მის ძველ, უფრო თამამ ალბომს… ალბათ, კაბამ მიკარნახა, რომ ასე მოვქცეულიყავი.”
ვიდეოებში ბრიტნი იმპროვიზებულ ქორეოგრაფიას ასრულებს ბიონსეს ძველ სიმღერებზე, მათ შორისაა Haunted 2014 წლის ალბომიდან Beyoncé. შავ მოკლე კაბასა და ქუსლიან ფეხსაცმელში გამოწყობილი სპირსი ასევე თავისუფლად ცეკვავს რიანას სიმღერებზე Love on the Brain და Unfaithful.
უკვე წლებია, რაც სპირსი ინსტაგრამზე რეგულარულად აზიარებს თავისი ცეკვის ვიდეოებს და, როგორც ჩანს, ამ ყველაფრით დიდ სიამოვნებას იღებს. რამდენიმე თვის წინ მომღერალი ნასვამ მდგომარეობაში მართვისთვის დააკავეს, რაც შემდგომ ნაკლებად მძიმე მუხლით გადაკვალიფიცირდა. ამის შემდეგ ბრიტნიმ სარეაბილიტაციო კლინიკას მიმართა.
„ბრიტნი სწორ ნაბიჯებს გადადგამს და დაემორჩილება კანონს. იმედია, ეს იქნება პირველი ნაბიჯი იმ დაგვიანებული ცვლილებისკენ, რომელიც ბრიტნის ცხოვრებაში უნდა მოხდეს,” – აღნიშნა მომღერლის წარმომადგენელმა დაკავების შემდეგ გავრცელებულ განცხადებაში. „იმედია, ის მიიღებს დახმარებასა და მხარდაჭერას, რომელიც ამ რთულ დროს სჭირდება.”
მნიშვნელოვანი სიახლეებია ასევე სპირსის ბიოგრაფიულ ფილმთან დაკავშირებით. The Hollywood Reporter-ის ცნობით, New Girl-ის შემქმნელი ლიზ მერივეზერი იმუშავებს ფილმზე, რომელიც 2023 წელს გამოცემული ბესტსელერი მემუარების საეკრანო ადაპტაცია იქნება. წიგნი The Woman In Me დეტალურად აღწერს სპირსის განვლილ გზას სუპერვარსკვლავობამდე, ასევე მის გამოწვევებს პირად ურთიერთობებში და მრავალწლიან ბრძოლას, თავი დაეღწია იურიდიული მეურვეობისთვის.
