რიანას მეცხრე ალბომი, როგორც იქნა, გზაშია?! ახალ ინტერვიუში A$AP Rocky-მ გაამხილა, რომ მომღერალი სტუდიაში დაბრუნდა და მუსიკას აქტიურად წერს.
როკიმ უარყო გავრცელებული თეორია, რომლის მიხედვითაც რიანას ამ დეკადაში ახალი ალბომი მათი ურთიერთობისა და სამი შვილის გამო არ გამოუცია.
„არა. ის ახლაც სტუდიაშია. დიახ. მაპატიე, საყვარელო. ის ახალ მუსიკაზე მუშაობს. ჯანდაბა, მგონი, ამის გამო პრობლემები შემექმნება,” – თქვა რეპერმა.
რიანას ახალ მუსიკასთან დაკავშირებით მნიშვნელოვანი სიახლეები, დიდი ხანია, საჯაროდ არ გავრცელებულა. სუპერვარსკვლავის ბოლო რელიზი 2025 წელს გამოსული ანიმაციური ფილმის, „სმურფების” საუნდტრეკისთვის ჩაწერილი სიმღერა Friend of Mine იყო.
რიანას ფანები აღტაცებული დარჩნენ, როცა წლის დასაწყისში მომღერალმა სოციალურ ქსელში მისი ცხოვრების ერთი დღის ამსახველი ვიდეო გამოაქვეყნა, სადაც ჩანდა, რომ ის კვლავ სტუდიაში მუშაობდა. „ამის შემდეგ სტუდიაში უნდა წავიდე,” – ამბობს რიანა თებერვალში გავრცელებულ ვიდეოში. „სტუდიის შემდეგ კი ჩვენს შვილს „მარდი გრას” კოსტიუმი უნდა გავუმზადო… ყველაზე გრძელი დღეა.”
ინტერვიუერმა ჯეისონ ლიმ ასევე გაიხსენა შემთხვევა, როცა დილის 4:30 საათისთვის Walgreens-ის მაღაზიაში სწორედ როკისა და რიანას გადაეყარა, სადაც წყვილი „ნერფის” თოფებით თამაშობდა. „თავიდან მაღაზიაში ჩვენ გარდა არავინ იყო. თქვენ კი ორი პატარა ბავშვივით სულელურად ერთობოდით და ეს ყველაზე სასაცილო რამ იყო,” – აღნიშნა ლიმ.
რიანას ბოლო ალბომი ANTI 2016 წელს გამოვიდა და ორი კვირა გაატარა Billboard 200-ის ლიდერის პოზიციაზე. მომღერალი სცენაზე ივლისში დაბრუნდა, როცა ჯეი-ზის ნიუ-იორკის კონცერტზე მოულოდნელი სტუმრის სახით წარდგა და სიმღერები Run This Town და Bitch Better Have My Money შეასრულა.
ნახეთ A$AP Rocky-ის სრული ინტერვიუ:
