მუსიკის ლეგენდა ანჯელიკ კიდჯო პირველი აფრიკელი მუსიკოსი და პირველი შავკანიანი აფრიკელი შემსრულებელი გახდება, რომელიც ჰოლივუდს დიდების ხეივანში საკუთარ ვარსკვლავს მიიღებს. ის შეუერთდება შარლიზ ტერონს, სამხრეთ აფრიკელ თეთრკანიან მსახიობს, რომელიც დიდების ხეივანში აფრიკას წარმოადგენს. ოსკაროსანმა მსახიობმა საკუთარი სახელობის ვარსკვლავი 2005 წელს მიიღო. კიდჯოს ვარსკვლავი ხეივანში რიგით 2 854-ე იქნება.
ვარსკვლავის გახსნის ცერემონია 18 აგვისტოს გაიმართება. ცერემონიაზე მუსიკოსს შეუერთდებიან მსახიობი უილიამ დეფო და გრემის ნომინანტი კომპოზიტორი და პროდიუსერი ჰარვი მეიზონ ჯუნიორი.
64 წლის კიდჯო დასავლეთ აფრიკის ქვეყანა ბენინში დაიბადა, თუმცა 1983 წელს საცხოვრებლად პარიზში გადავიდა. მას მიღებული აქვს ხუთი გრემი: ერთხელ – საუკეთესო თანამედროვე მსოფლიო მუსიკის ალბომისთვის, ხოლო ოთხჯერ – საუკეთესო გლობალური მუსიკის ალბომისთვის.
1981 წლიდან კიდჯოს გამოცემული აქვს 19 ალბომი. დასავლეთ აფრიკული სტილის ფანკთან, ჯაზსა და R&B-სთან შერწყმის უნიკალური უნარით მას ფანები მთელი მსოფლიოს გარშემო ჰყავს. მუსიკოსს უმუშავია ისეთ არტისტებთან, როგორებიც არიან: Burna Boy, ალიშა კისი, ჯონ ლეჯენდი, ბონო, სტინგი და სხვები.
ლოს-ანჯელესში დიდების ხეივანს ჰოლივუდის სავაჭრო პალატა მართავს. 1960 წლიდან მოყოლებული, ეს კულტურული ღირსშესანიშნაობა მილიონობით ადამიანს აქვს მონახულებული.
