Tbilisi Hip-Hop Festival – თბილისში ურბანული კულტურის პირველი ფესტივალი გაიმართება

Tbilisi Hip-Hop Festival-ის შესახებ Billboard Georgia ფესტივალის თანადამფუძნებელს, ჯაბა შავიშვილს ესაუბრა.
Tbilisi Hip-Hop Festival

17 ოქტომბერს Factory Tbilisi-ს მულტიფუნქციური სივრცე თბილისში პირველ Tbilisi Hip-Hop Festival-ს უმასპინძლებს. ფესტივალი ურბანული კულტურის სხვადასხვა ფორმას – მუსიკას, ქუჩის ცეკვასა და ვიზუალურ ხელოვნებას გააერთიანებს.

ფესტივალის პროგრამა მოიცავს როგორც ქართველ, ასევე უცხოელ შემსრულებლებს. მსმენელის წინაშე წარდგებიან: 

Talib Kweli – არტისტი, რომელიც ბოლო 25 წლის განმავლობაში სოციალური ჰიპ-ჰოპის მთავარ ფიგურად მიიჩნევა. ის ცნობილია Mos Def-თან საკულტო პროექტით, სახელწოდებით Black Star.

FLOHIO – სამხრეთ ლონდონის ახალი ტალღის ბრიტანული რეპ-სცენის წარმომადგენელი, რომელიც გრაიმს, რეპსა და ელექტრონულ მუსიკას ერთ ჟღერადობად გარდაქმნის.

საერთაშორისო ჰედლაინერებთან ერთად, მსმენელის წინაშე ასევე წარდგებიან ქართული ჰიპ-ჰოპ სცენის გამორჩეული არტისტები: TAHA, Kay G, Mush One.

მუსიკალურ პერფორმანსებთან ერთად დაგეგმილია აქტივობები და შოუქეისებიც.

Tbilisi Hip-Hop Festival-ის შესახებ Billboard Georgia ფესტივალის თანადამფუძნებელს, ჯაბა შავიშვილს ესაუბრა. როგორც ის აღნიშნავს, Tbilisi Hip-Hop Festival წლობით დაგროვილი ცოდნისა და გამოცდილების მატერიალიზაციაა, რომლის მიხედვითაც ქართულ სცენას საკუთარი ინსტიტუციური პლატფორმა სჭირდება:

„90-იანების თბილისში, უშუქობის, ქაოსისა და ჩაკეტილი საზღვრების ფონზე, ჩვენთვის ჰიპ-ჰოპი არ ყოფილა უბრალოდ მუსიკა – ის იყო სრულიად სხვა სამყაროს აღმოჩენა. დაბალი ხარისხის, გადაწერილი კასეტებით, გაცვლილი CD-ებითა და MTV-ის ფრაგმენტებით ჩვენ თვალწინ უზარმაზარი კულტურა გადაიშალა. მაშინ ენა კარგად არ გვესმოდა, სიტყვების მნიშვნელობა ბოლომდე არ ვიცოდით, მაგრამ გრუვმა, რიტმმა და იმ პირველყოფილმა ენერგიამ თავისი გააკეთა – ყველანი უკლებლივ ამ მუსიკისკენ წაგვიყვანა. ასე გაიხსნა ჩვენთვის აფროამერიკული მემკვიდრეობა: ჯაზის, სოულისა და ფანკის სემპლები, პროტესტი და შინაგანი ძალა, რომლითაც ადამიანები საკუთარ იდენტობას იცავდნენ. ამ კულტურამ მაშინ მთელი თაობა მოაჯადოვა და ჩვენთვის თავისუფლების მთავარ ენად იქცა.

Tbilisi Hip-Hop Festival-ის იდეა არ გაჩენილა ერთ დღეში და არც გარედან დაკვირვების შედეგია – ეს არის წლების განმავლობაში ჰიპ-ჰოპის საფუძვლიანი მოსმენის, მისი ისტორიისა და ფესვების უწყვეტი კვლევის და ამ კულტურისადმი პირადი, ორგანული სიყვარულის ლოგიკური შედეგი. რაც უფრო ღრმად შევდიოდით ამ მუსიკაში – ვინილის დიგინგიდან და ჯაზის და სოულის სემპლებიდან დაწყებული, ურბანული პოეზიისა და სოციალური პროტესტის ანალიზით დასრულებული – მით უფრო ნათელი ხდებოდა ერთი რამ: ჰიპ-ჰოპი არ არის რომელიმე სხვა ფესტივალის „გვერდითი სცენა“ ან საკლუბო ღამის დროებითი ჩანართი. ეს არის თვითმყოფადი, მასშტაბური კულტურა, რომელსაც სჭირდება საკუთარი, ავტონომიური სივრცე – სახლი, სადაც მისი ყველა ელემენტი სრულფასოვნად გაიშლება და სადაც ეს საზოგადოება თავს მასპინძლად იგრძნობს.“

პროექტის მიღმა დგას გუნდი, რომლისთვისაც ეს ფესტივალი მუსიკალურ ინდუსტრიასთან მრავალწლიანი პროფესიული კავშირის ბუნებრივი გაგრძელებაა. მათი გამოცდილება მსხვილი ფესტივალებისა და ფროდაქშენის მართვას, საერთაშორისო არტისტ-მენეჯმენტსა და ბუქინგს, სტრატეგიულ მარკეტინგს, მუსიკალურ ჟურნალისტიკასა და ჰიპ-ჰოპის კულტურის კვლევას აერთიანებს. 

Tbilisi Hip-Hop Festival-ის მთავარი ფილოსოფიაა Celebrating Hip-Hop Culture, რომელიც ჟანრს მხოლოდ მუსიკალურ შოუდ არ აღქვამს. ფესტივალის კონცეფცია ჰიპ-ჰოპის ხუთ ფუნდამენტურ ელემენტს ეფუძნება: MCing – თხრობა და რითმა, DJing – რიტმი და არქივაცია, Breaking – სხეულის ენა და ცეკვა, Graffiti – ქალაქის სივრცის აღქმა, Knowledge – ცნობიერება, ისტორია და საკუთარი ფესვების ცოდნა.

პროექტის შინაარსობრივ ბირთვს წარმოადგენს ვინილის კულტურა, სემპლინგი და ე.წ. დიგინგი (Digging) — იშვიათი ფირფიტების, მივიწყებული ჯაზისა და სოულის ბითების ძიების ხელოვნება. ორგანიზატორების ხედვით, ეს არის შეხსენება, რომ ჰიპ-ჰოპი ცოცხალ, ფიზიკურ არქივებზე დგას და არა მხოლოდ ციფრულ ფაილებზე.

ფესტივალის სტრატეგია მხოლოდ ჰიპ-ჰოპის ჟანრით არ შემოიფარგლება. მის ბაზაზე ეტაპობრივად გაიშლება აფროამერიკული მუსიკის სპექტრი – ჯაზი, ფანკი, სოული, ნეო-სოული და ბითმეიკინგ კულტურა, რაც გაფართოებული ვორქშოფებით, ლექციებითა და საგანმანათლებლო პროგრამებით დაიტვირთება.

სწორედ ამ მრავალმხრივი კონცეფციიდან გამომდინარე, ფესტივალის პროგრამა შუადღის 12:00 საათიდან იწყება: დღის ნაწილი სრულად ეთმობა ცეკვისა და გრაფიტის ბეთლებს, დოკუმენტალისტიკას, საარქივო გამოფენებს, ვინილის კუთხესა და ვორქშოფებს, ხოლო მთავარი სცენა 20:00 საათზე იხსნება. ამის გათვალისწინებით, Tbilisi Hip-Hop Festival ერთგვარი კულტურული გამოცდილებაა, სადაც ისტორიასა და ვიზუალურ ხელოვნებას მუსიკალურ შოუებზე არანაკლებ მნიშვნელოვანი ადგილი უკავია.

წლების განმავლობაში ქართულ საფესტივალო სივრცეში ჰიპ-ჰოპს ცენტრალური ადგილი არასდროს ეჭირა. ის, როგორც წესი, როკ თუ ელექტრონული მუსიკის ფესტივალებზე პატარა სცენით ან ცალკეული, მცირე ღონისძიებებით შემოიფარგლებოდა. Tbilisi Hip-Hop Festival ამ რეალობას ცვლის და სრულიად ახალ სივრცეს ქმნის – ადგილს, სადაც ჰიპ-ჰოპი უბრალოდ სტუმარი კი არ არის, არამედ მთავარი მასპინძელია.

ჯაბა შავიშვილი:

„ფესტივალის მთავარი პრინციპი ადგილობრივი ენისა და იდენტობის აღიარებაა. ქართულმა სცენამ 70-იანების ბრონქსის ენა პირდაპირ არ გადმოიტანა და თბილისის რეალობას მოარგო. ეს არ არის ამერიკული კულტურის ბრმა კოპირება – ეს არის ქართული ენის უნიკალური რიტმიკა, ლოკალური სოციალური კონტექსტი და თბილისური ყოფის გულწრფელი თხრობა. TAHA, Kay G და Mush One იმავე მასშტაბითა და პატივისცემით წერია აფიშაზე, როგორც უცხოელი ჰედლაინერები.

ფესტივალი აერთიანებს ორ ეპოქას – 90-იანების კასეტების თაობასა და დღევანდელ ახალგაზრდებს, რომლებიც თანამედროვე ჟღერადობას ქმნიან. ამასთან, ეს არის დამოუკიდებელი მუსიკალური ეკოსისტემის შექმნის მცდელობა: ფესტივალი უნდა იქცეს იმპულსად ახალი ქართული ლეიბლებისთვის, ბითმეიკერებისთვის, პროდიუსერებისა და დამწყები MC-ებისთვის. ეს არის ლოკალური სცენის ექსპორტის პლატფორმა, რომელიც ქართულ ანდერგრაუნდსა და გლობალურ მუსიკალურ ინდუსტრიას შორის მუდმივ, პროფესიულ ხიდს აშენებს.“

Tbilisi Hip-Hop Festival-ის ორგანიზატორების ხედვით, ფესტივალის, როგორც პლატფორმის მთავარი მიზანიც სწორედ ეს არის – შექმნას დღე, რომლის დასრულების შემდეგაც მაყურებელს არა მხოლოდ კარგი მუსიკალური შოუების შთაბეჭდილება, არამედ იმ კულტურის სრული გამოცდილება გაჰყვება, რომელზეც მთელი თაობები გაიზარდნენ და რომელიც დღესაც უწყვეტად ვითარდება.

ფესტივალის პროგრამის შესახებ მეტი დეტალი იხილეთ ბმულზე.

Share
Tweet
Share
Share
Share

Leave a Reply

წინა სტატია

გრემის მუზეუმში ოლივია როდრიგოს გამოფენა გაიხსნება

შემდეგი სტატია

ოლივია როდრიგო

კვირის მუსიკალური გზამკვლევი – ოლივია როდრიგო, ალექს უორენი, JENNIE, Rod Wave და სხვა არტისტები

შეიძლება დაგაინტერესოთ

„ჩაწერის ერთ-ერთი საუკეთესო გამოცდილება, რაც კი შეიძლება გქონდეს“ – მაიკ მილსი R.E.M.-ის ალბომის, Reveal-ის შესახებ საუბრობს

საიუბილეო დელუქს გამოცემა მოიცავს იმ პერიოდის აქამდე გამოუქვეყნებელ ცოცხალ კონცერტსაც.
მეტი

რობერტ გლასპერი ხსნის, რატომ არ შეუძლია ხელოვნურ ინტელექტს გაიმეოროს ის ადამიანური „შეცდომები“, რომლებიც მუსიკას ცოცხალსა და ნამდვილს ხდის

ინტერვიუს მსვლელობისას გლასპერმა სხვადასხვა არტისტთან კოლაბორაციის შესახებაც ისაუბრა.
მეტი

ბრუნო მარსი მამის გარდაცვალებას გლოვობს: „ადამიანი, რომელმაც ყველაფერი მასწავლა, რაც კი ვიცი“

„ჩემს თვალში ის მსოფლიოში საუკეთესო მამა იყო“, – დაწერა გრემის მფლობელმა მუსიკოსმა.
მეტი
პოლ მაკარტნი ტურნეს - Got Back-ის კონცერტზე, 2022 წლის 13 მაისი, კალიფორნია, ლოს-ანჯელესი, SoFi-ს სტადიონი Michael Buckner/PMC

უკრაინელი ქალებისა და ბავშვების მხარდასაჭერ საქველმოქმედო კონცერტზე Songs of Freedom პოლ მაკარტნი, ბარბრა სტრეიზანდი, შონ პენი და სხვა ვარსკვლავები მიიღებენ მონაწილეობას

კონცერტი 2027 წლის 3 თებერვალს დიდ ბრიტანეთში, მანჩესტერში, Co-op Live-ის არენაზე გაიმართება.
მეტი

რიანამ და დუა ლიპამ ბრილიანტისა და პლატინის სერტიფიკატების მთელი წყება მოიპოვეს 

ლიპას 2020 წლის ალბომის, Future Nostalgia-ს მთავარი ჰიტი მის კარიერაში პირველი სიმღერაა, რომელმაც ბრილიანტის სერტიფიკატი მიიღო.
მეტი
LISA ფილმიდან Always Lalisa სიმღერა Leave With Me LLOUD/ YouTube

LISA-მ ფილმიდან Always Lalisa ახალი ემოციური სინგლი Leave With Me  წარადგინა

ნელი, მელოდიური ბალადა დოკუმენტური ფილმის ტიტრების ფონზე ჟღერს. ფილმის ნახვა ექსკლუზიურად YouTube Premium-ზეა შესაძლებელი.
მეტი
wayward.atom ფოტო: ნინუცა კაკაბაძე

ქართული ელექტრონული მუსიკა საერთაშორისო სცენაზე – wayward.atom-ის გამოცდილება Sonica Glasgow-ზე და სამომავლო გეგმები

თბილისსა და გლაზგოს შორის ახალი კულტურული ხიდი შენდება - 2027 წელს საქართველო ექსპერიმენტული მუსიკის მასშტაბურ შოუქეისს უმასპინძლებს.
მეტი