ტეილორ სვიფტმა 50 000 დოლარი გადარიცხა GoFundMe-ის საქველმოქმედო კამპანიაში ენტონი ტონტონის დასახმარებლად. ტონტონი კონექტიკუტელი სამი შვილის დედაა, რომელმაც როდ-აილენდზე მომხდარი ავტოსაგზაო შემთხვევისას უცნობების გადარჩენის მცდელობისას სიცოცხლისთვის საშიში დაზიანებები მიიღო.
42 წლის ტონტონი, რომელიც სერტიფიცირებული ექთნის ასისტენტია, ივლისში უმცროს ქალიშვილთან ერთად გზატკეცილზე გადაადგილდებოდა, როდესაც წვიმაში მოცურებული მოზარდების ავტომობილი შეამჩნია. იგი მათ უსაფრთხო ადგილას გადასაყვანად გაჩერდა. დახმარების პროცესში კიდევ ერთი ავტომობილი მოცურდა და ავტომობილს დაეჯახა. ტონტონმა ერთ-ერთ მოზარდს ხელი ჰკრა და გზიდან გადაიყვანა, დარტყმა კი თავად მიიღო. მას შემდეგ მას ორი რთული ოპერაცია ჩუტარდა და წინ კიდევ რამდენიმე ქირურგიული ჩარევა ელის. ოჯახის განცხადებით, რეაბილიტაციას შესაძლოა მთელი წელი დასჭირდეს.
სვიფტის 50 000-დოლარიანი შემოწირულობა, რომელიც Rolling Stone-მა და People-მა დაადასტურეს, ყველაზე მსხვილი ინდივიდუალური დონაციაა კამპანიაში. 28 აგვისტოს მონაცემებით, ფონდში 64 000 დოლარზე მეტი იყო შეგროვილი, ხოლო ოჯახისთვის ცალკე შექმნილი Meal Train-ის კამპანიის შედეგად 16 000 დოლარზე მეტი ჩაირიცხა. სვიფტმა GoFundMe-ის კომენტარებში ტონტონს შეტყობინებაც დაუტოვა: „საუკეთესო რეაბილიტაციას გისურვებ და სიყვარულს ვუგზავნი შენს ოჯახს! ტეილორი“.
სვიფტი ხშირად რიცხავს დონაციებს GoFundMe კამპანიებში. ის ძირითადად იმ ადამიანებს ეხმარება, რომლებსაც სამედიცინო დახმარება სჭირდებათ, ან სტიქიური მოვლენებისა და უბედური შემთხვევებისას ზარალდებიან. გარდა ამისა, ივლისში გამართული ქორწინების ცერემონიამდე, სვიფტმა და მისმა ქმარმა, ტრევის კელსიმ 26 მილიონი დოლარი გადაურიცხეს შეერთებული შტატების 20 საქველმოქმედო ორგანიზაციას.
