საქართველოს 2026 წლის საბავშვო ევროვიზიის წარმომადგენელი დავით ლომიძეა. პირველი არხის ტელეპროექტ „რანინას“ მე-9 სეზონის გამარჯვებული კონკურსზე სიმღერას Sun of the Rooftops შეასრულებს.
საკონკურსო სიმღერისა და მუსიკალური კლიპის პრემიერა 16 სექტემბერს პირველი არხის ეთერში შედგა. სიმღერა უკვე ხელმისაწვდომია Spotify-ზე, მუსიკალური კლიპი კი მოგვიანებით YouTube-ზე გამოქვეყნდება.
Sun of the Rooftops-ის კომპოზიტორი გიგა კუხიანიძეა, ტექსტის ავტორი – ირინა სანიკიძე. მუსიკალური კლიპის რეჟისორი ზაზა ორაშვილია, მხატვარი – შაკო პოპიაშვილი, კოსტიუმების დიზაინზე კი იზა ნადარეიშვილმა იზრუნა. კლიპის ქორეოგრაფია გიორგი ტორიაშვილს ეკუთვნის. მუსიკალური ვიდეოს გადაღებები კი აჭარაში მიმდინარეობდა.
წლევანდელ საბავშვო ევროვიზიას მალტა უმასპინძლებს. რიგით 24-ე კონკურსი 24 ოქტომბერს გაიმართება და მასში 16 ქვეყნის წარმომადგენელი მიიღებს მონაწილეობას.
ცნობისთვის, 2025 წლის საბავშვო ევროვიზიის კონკურსი თბილისში გაიმართა, სადაც გამარჯვება საფრანგეთის წარმომადგენელმა მოიპოვა.
მოისმინეთ საქართველოს საკონკურსო სიმღერა – Sun of the Rooftops:
