წელს კახეთი უკვე მეათედ უმასპინძლებს ჯაზისა და ღვინის ფესტივალს. საიუბილეო ღონისძიება 10 ოქტომბერს წინანდლის მამულში გაიმართება და სტუმრებს, ტრადიციულად, ღვინისა და ჯაზის განსაკუთრებულ სინთეზს შესთავაზებს.
ფესტივალზე წარმოდგენილი იქნება 40 ქართული ღვინის კომპანია, რომლებიც სტუმრებს საკუთარ პროდუქციას გააცნობენ. ღვინის დეგუსტაცია კი ჯაზმუსიკის ფონზე შედგება.
ფესტივალის ისტორიისა და წლევანდელი ღონისძიების შესახებ Billboard საქართველოს Eastern Promotions-ის დამფუძნებელი, კახა კანდელაკი ესაუბრა.
„Jazz and Wine მსოფლიო ბრენდია და იმ რეგიონებში იმართება, სადაც ღვინის წარმოება ხდება, მაგალითად, კალიფორნიაში, ბორდოში. ღონისძიების 50% ღვინოს ეთმობა, 50% კი – ჯაზს. ჩვენი ფესტივალიც ამ მსოფლიო ბრენდის ნაწილია და სწორედ ამიტომ დაიწყო მისი ისტორია კახეთში, როგორც ღვინის რეგიონში.
2017 წელს შედგა პირველი ფესტივალი და წელს უკვე მეათედ იმართება. ამ დროის განმავლობაში იმდენად დიდი ნდობა და გამოხმაურება მოვიპოვეთ, რომ თუ თავდაპირველად მხოლოდ 7-10 ღვინის კომპანია გვყავდა წარმოდგენილი, წელს უპრეცედენტო რაოდენობის, 40 მონაწილე გვყავს, რომელთათვისაც ამ ფესტივალში მონაწილეობა სრულიად უფასოა. თანაც, ეს კომპანიები არ არიან დიდი ქარხნები – არამედ მცირე, საოჯახო წარმოებებია. მათთვის ეს არის შესაძლებლობა, საკუთარი პროდუქცია ფართო საზოგადოებას გააცნონ როგორც ადგილობრივ, ისე საერთაშორისო ბაზარზე.”
ფესტივალის მეორე ნახევარი მუსიკას ეთმობა – ჯაზს, რომელიც გარემოს განსაკუთრებულ ატმოსფეროს სძენს. ერთდღიანი პროგრამა საკმაოდ დატვირთული და მრავალფეროვანია, რომლის ფარგლებშიც სტუმრების წინაშე სხვადასხვა ქვეყნიდან ჩამოსული არტისტები წარდგებიან.
„მუსიკალურ პროგრამას გახსნის იტალიური ბენდი Sugarpie and Candymen, რომელიც ისეთი შემსრულებლების ჰიტებს, როგორებიც არიან The Beatles-ის, The Rolling Stones და Queen, ახალი, საკუთარი არანჟირებებით წარმოადგენს. მათთან ერთად ასევე იქნება იტალიელი შეფი, რომელიც პარალელურად კერძებს მოამზადებს და სტუმრებს სვინგის ფონზე უმასპინძლებს.
პროგრამის მეორე ნაწილი ფანკისა და ჯაზის ერთ-ერთ უდიდეს ლეგენდას, ფრედ უესლის დაეთმობა. წლების განმავლობაში ის იყო ჯეიმს ბრაუნის მუსიკოსი და არაერთი ჰიტის თანაავტორი. მასთან ერთად უესლი ფანკის ფუძემდებლადაც კი მიიჩნევა. ეს დიდი და, შესაძლოა, ერთ-ერთი ბოლო შანსიც იყოს მელომანებისთვის, რადგან იმ მუსიკოსებიდან, ვისაც ჯეიმს ბრაუნთან და რეი ჩარლზთან უთანამშრომლია, პრაქტიკულად აღარავინ დადის ტურნეში, ფრედ უესლის გარდა. ასე რომ, ეს შესაძლებლობა არც ჩვენ გავუშვით ხელიდან.
დღის ბოლოს კი ფესტივალს დიდი დღესასწაული დახურავს. სცენაზე შვეიცარიულ-ამერიკული ბენდი JJ’s Hausband წარდგება და სტუმრებს Soul Train-ის კონცერტს შესთავაზებს. Soul Train უმნიშვნელოვანესი შოუ იყო ამერიკული ტელევიზიის ისტორიაში, რომელმაც მსოფლიოს ისეთი ლეგენდები გააცნო, როგორებიც არიან არეთა ფრანკლინი, მარვინ გეი, ბარი უაიტი, სტივი უანდერი და სხვები. ეს იქნება ნამდვილი ფოიერვერკი, რომლითაც ჩვენი წლევანდელი ფესტივალი დასრულდება.”
ჯაზისა და ღვინის ფესტივალი 10 ოქტომბერს, 13:00 საათზე დაიწყება და 00:00 საათამდე გაგრძელდება. ღონისძიება უმასპინძლებს სტუმრებს მსოფლიოს სხვადასხვა ქვეყნიდან, რომლებიც კახეთში სწორედ ამ დღისთვის ჩამოდიან. ღვინის ქართული ტრადიციისა და საერთაშორისო მუსიკის ერთ სივრცეში გაერთიანება არა მხოლოდ მუსიკალურ ფესტივალად, არამედ რეგიონის პოპულარიზაციის მნიშვნელოვნად პლატფორმადაც იქცა.
„ძალიან ბევრი ადამიანი მოდის – სრული ანშლაგია. ტურისტები სპეციალურად ამ ფესტივალისთვის ჩამოდიან. ყველაფერთან ერთად, ეს არის ადგილობრივი ეკონომიკის ხელშეწყობა, ღვინის მწარმოებლების მხარდაჭერა და, რა თქმა უნდა, მაღალი ხარისხის მუსიკა, რომელიც უკვე წლებია, ჩვენს სავიზიტო ბარათად იქცა. შეიძლება ითქვას, რომ ჩვენ ვართ ხარისხის მედიატორები. წლებია, ქვეყანა სწორედ ამ ჯაზფესტივალების ხარისხზე სწორდება. საქართველო კი რეგიონში კულტურის ცენტრია და ეს თამასა აუცილებლად უნდა გვეჭიროს.
შეგვიძლია ვთქვათ, რომ ჯაზფესტივალების უწყვეტი წრე შევკარით: შემოდგომაზე – ჯაზისა და ღვინის ფესტივალი, ზამთარში – ზამთრის ჯაზფესტივალი, გაზაფხულზე – თბილისის ჯაზფესტივალი, ზაფხულში კი – Black Sea Jazz Festival. ასე რომ, ყველა სეზონზე და პრინციპში, ყველა რეგიონში ვართ.”
ბილეთები შეიძინეთ ბმულზე.
