კიმ კარდაშიანმა The Sunday Times-თან ახალ ინტერვიუში საკუთარ ოჯახურ ცხოვრებაზე ისაუბრა. ვარსკვლავმა აღნიშნა, რომ ის და კანიე უესტი, რომლებიც ერთმანეთს 2021 წლის დასაწყისში დაშორდნენ, ცდილობენ ერთიანი პოზიცია ჰქონდეთ თავიანთი ქალიშვილის – 13 წლის ნორს უესტის კარიერულ მისწრაფებებთან დაკავშირებით.
„ეს ის საკითხია, რაზეც მე და მის მამას კარგი კომუნიკაცია გვაქვს. ჩვენ ერთ პოზიციაზე ვთანხმდებით და ის მონაწილეობს მხოლოდ იმ პროექტებში, რომლებსაც ორივე ვეთანხმებით,” – თქვა კიმ კარდაშიანმა.
კიმ კარდაშიანს Ye-სგან ოთხი შვილი ჰყავს: ნორსი, 10 წლის სეინტი, 8 წლის ჩიკაგო და 7 წლის ფსალმი. კარდაშიანმა ასევე ისაუბრა იმის შესახებ, თუ რამდენად ამბიციურია მათი უფროსი ქალიშვილი, როდესაც საქმე შემოქმედებას ეხება:
„ნორსს ეს ყველაზე მეტად უყვარს. საჯარო პროექტებში მონაწილეობა სურს. ვცდილობ, დავტკბე ამ მომენტებით და არ მივცე უფლება, ხელი მოჰკიდოს ყველა პროექტს, რაც კარიერულ გზაზე შეხვდება. ვცდილობთ, ყოველთვის დარწმუნებულები ვიყოთ, რომ ყველაფერს სწორად ვმართავთ,” – აღნიშნა კარდაშიანმა.
ნორს უესტი Billboard-ის 2026 წლის „21 Under 21“-ის სიის წევრი გახდა. მაისში მან სადებიუტო EP – N0rth4evr გამოუშვა. ის გახდა ერთ-ერთი ყველაზე ახალგაზრდა არტისტი, რომელიც Billboard Hot 100-ში მოხვდა, როდესაც 10 წლის ასაკში Ye-სთან და Ty Dolla $ign-თან ერთად ჩაწერილმა სიმღერამ – Talking – ჩარტში 30-ე ადგილი დაიკავა. ნორსმა ასევე მიიღო მონაწილეობა უესტისა და Ty-ს 2024 წლის ალბომში Vultures.
„ხალხი ბევრს საუბრობს იმაზე, თუ რას ვაკეთებ და როგორ ვაკეთებ. ახალგაზრდა არტისტმა ჯერ თავად უნდა გაარკვიო, ვინ ხარ, სანამ სამყარო შეეცდება გითხრას, ვინ უნდა იყო,” – თქვა ნორს უესტმა Billboard-თან ინტერვიუში.
აგვისტოში ნორსმა ჩიკაგოში თავისი პირველი სოლო კონცერტი გამართა, რომელსაც ორივე მშობელი დაესწრო და მხარდაჭერა გამოუცხადა. წლის დასაწყისში იგეგმებოდა მისი ერთობლივი ტურნე მოლი სანტანასთან ერთად, თუმცა ტური გაუქმდა.
უესტმა და კიმ კარდაშიანმა ურთიერთობა 2012 წელს დაიწყეს, 2014 წელს კი იტალიაში იქორწინეს. კარდაშიანმა განქორწინებაზე განაცხადი 2021 წლის თებერვალში შეიტანა, ხოლო პროცესი 2022 წლის ნოემბერში, შეთანხმებით დასრულდა.
