11 ოქტომბერს თბილისში, TATUZA Jazz Club-ში ფანკისა და ჯაზის სცენის ერთ-ერთი ყველაზე გავლენიანი მუსიკოსი, ამერიკელი ტრომბონისტი, კომპოზიტორი და ბენდლიდერი ფრედ უესლი თავის ჯგუფთან – The New JBs-ისთან ერთად წარდგება.
საღამო მსმენელს კლასიკური ამერიკული ფანკის, სოულისა და ჯაზის სინთეზს შესთავაზებს.
ფრედ უესლი ამერიკული მუსიკალური ინდუსტრიის ცნობილი ფიგურაა, რომლის შემოქმედებამაც დიდი როლი შეასრულა თანამედროვე ფანკის ჟღერადობის ჩამოყალიბებაში. 1968-1975 წლებში უესლი ჯეიმს ბრაუნის ლეგენდარული ბენდის, The J.B.’s-ის მუსიკალური ხელმძღვანელი, არანჟირების ავტორი და ერთ-ერთი მთავარი კომპოზიტორი იყო. სწორედ მისი ტრომბონის განსაკუთრებულმა რიტმმა და არანჟირებამ შექმნა ისეთი კლასიკური ჰიტების ჟღერადობა, რომლებმაც მოგვიანებით ჰიპ-ჰოპისა და R&B-ის განვითარებაზეც დიდი კვალი დატოვა.
უესლის მუსიკალური კარიერა სცდება მხოლოდ ფანკის ფარგლებს. სხვადასხვა დროს მას მჭიდრო შემოქმედებითი თანამშრომლობა აკავშირებდა ისეთ ლეგენდარულ არტისტებთან, როგორებიც არიან ჯორჯ კლინტონი, ბუტსი კოლინზი, რეი ჩარლზი, კურტის მეიფილდი, ვან მორისონი და საკულტო Count Basie Orchestra.
ფრედ უესლის მრავალფეროვან შემოქმედებით გზაზე ასევე მნიშვნელოვანი ადგილი უკავია 2014 წელს დაარსებულ პროექტს – Fred Wesley Generations-ს, რომლის ფარგლებშიც მუსიკოსი იტალიელ ორღანისტ ლეონარდო კორადისთან და ფრანგ დრამერ ტონი მაჩთან ერთად თავის მრავალწლიან შემოქმედებას ჯაზისა და სოულის ტრადიციებს უკავშირებს. 11 ოქტომბრის Tatuza Jazz Club-ში აუდიტორიას ექნება შესაძლებლობა, ცოცხლად მოუსმინოს არტისტს, რომელსაც მუსიკალურ ინდუსტრიაში განსაკუთრებული ადგილი უკავია.
მუსიკალურ საღამოზე კარი გაიღება 21:00 საათზე, ხოლო კონცერტი 22:00 საათზე დაიწყება.
დასასწრები ბილეთების შეძენა შესაძლებელია როგორც ადგილზე, ასევე ონლაინ ბმულზე – tkt.ge/tatuza.
TBC Concept-ის VISA ბარათისა და VISA Signature სამოგზაურო ბარათის მფლობელებისთვის მოქმედებს 15%-იანი ფასდაკლება.
ღონისძიების პარტნიორია Eastern Promotions.
მეტი დეტალისათვის ეწვიეთ Tatuza Jazz Club-ის სოციალური მედიის ოფიციალურ არხს.
