მუსიკალური ნამუშევრის შექმნას ხშირად სპონტანური იდეები, მოვლენების ქაოტური განვითარება და მოულოდნელი გადაწყვეტილებები უძღვის წინ. ქართული როკბენდის, TRIGGER-ის ახალი კომპოზიციაც სწორედ ასეთ გარემოში შეიქმნა.
ბენდმა სიმღერის სახელწოდებაც სპონტანურად შეარჩია, NEW FUNK – Funk-ის ჟანრით შთაგონებული სიმღერაა, რომელსაც ჯგუფმა უფრო მძიმე ჟღერადობა შემატა.
„სიმღერა სარეპეტიციოში მომხდარი კონფლიქტის შედეგად, დაძაბულობის გასანეიტრალებლად დაიწერა – „უბრალოდ გავჩუმდეთ და რამე დავუკრათ“. სახელზეც ბევრი არ გვიფიქრია, უბრალოდ, Funk-ის ჟანრს მივამსგავსეთ და რადგან უფრო მძიმე კონტექტში გადავიაზრეთ, დავარქვით – NEW FUNK.
კლიპის იდეა ჩვენმა დრამერმა, დათო ვარშანიძემ ჩამოაყალიბა. იმის ნაცვლად, რომ ფოკუსში ჩვენ ვყოფილიყავით, მთავარი პერსონაჟის როლში ჩვენი მეგობარი რაულ შარაბიძე გადავიღეთ, რომელიც ცდილობს, გაიხსენოს წინა ღამის მოვლენები. ვეცადეთ, რომ გადაღების პროცესი რაც შეიძლება თავისუფალი და გასართობი ყოფილიყო. მოვიარეთ ადგილები, სადაც ყველაზე ხშირად ვიკრიბებით. ამაში სხვა მეგობრებმაც შეგვიწყვეს ხელი.
ვიდეოკლიპის გადაღებაზე და მონტაჟზე ეკატერინე ზანგურაშვილი და ჩვენი მეგობარი SKUF – მუშაობდნენ. ლოგოზე და სხვა სახის ვიზუალურ მედიაზე კი INKED MANIAC (ევგენი კურიგიანი).” – TRIGGER.
ბენდის ისტორია 2022 წელს დაიწყო, როდესაც დევი არუთუნიანმა (ბასი, ვოკალი) და დათო ვარშანიძემ (დრამი) მუსიკალური დუეტი შექმნეს. მალევე მათ ნიკა კეკელიძე (სოლო გიტარა) და ერიკ მურადიანი (რიტმ გიტარა, ვოკალი) შეუერთდნენ. მოგვიანებით კი TRIGGER-ის შემადგენლობას KOSMOSS-ის გიტარისტი ნიკოლოზ „კარსო“ კარსანიძეც დაემატა. დღეს TRIGGER ხუთი მუსიკოსისგან შედგება, ჯგუფი ახალ იდეებზე მუშაობს და მსმენელს არაერთ მუსიკალურ სიახლეს ჰპირდება.
მოუსმინეთ TRIGGER-ის ახალ სიმღერას NEW FUNK და ნახეთ ვიდეოკლიპი:
