Billboard Women in Music-ის იტალიურ რიგით მესამე დაჯილდოებას 10 ნოემბერს, მილანში მდებარე შთამბეჭდავი სივრცე Vesta Fiori Chiari – უმასპინძლებს. წლევანდელი ღონისძიების კონცეფციაა The Voices Edition, რომლის მიზანიც საპატიო ჯილდოს მფლობელი ქალების შემოქმედებითი გზისა და ინდივიდუალური ხედვების წარმოჩენაა. ღონისძიება ყურადღებას გაამახვილებს მათ პირად და პროფესიულ წვლილზე მუსიკალურ ინდუსტრიაში და იმ გავლენაზე, რომელსაც ისინი საკუთარი საქმიანობით მის განვითარებასა და გარდაქმნაზე ახდენენ.
საღამოს კომიკოსი და მწერალი ჯორჯია ფუმო წარუძღვება.
ყველაზე მოსალოდნელ ჯილდოს, „წლის ქალის“ ტიტულს, იტალიელი მომღერალი Madame მიიღებს, რომელმაც 2026 წელს სცენაზე დაბრუნება ახალი ალბომით (Disincanto) და საკონცერტო ტურნეთი აღნიშნა.
თავისი თაობის ერთ-ერთმა გამორჩეულმა არტისტმა წლების განმავლობაში ინდივიდუალური შემოქმედებითი სტილი ჩამოაყალიბა, რომელშიც სიმღერების წერასა და პოპმუსიკის ექსპერიმენტებს თავისუფლად აერთიანებს. ეს ჯილდო მის მუდმივ შემოქმედებით განვითარებასა და იტალიურ მუსიკალურ სამყაროში მნიშვნელოვანი კვალის დატოვებას ეძღვნება.
„წლის ქალის“ ჯილდოს მფლობელთან ერთად – Billboard Italy Women in Music 2026-ის ყველა საპატიო ჯილდოს მფლობელი უკვე ცნობილია:
- საკულტო არტისტი – ლორედანა ბერტე
- წლის გამორჩეული ენერგია – დიტონელაპიაგა
- წლის გავლენა – Elisa
- წლის სიმღერების ავტორი – ფრანჩესკა მიქიელინი
- წლის DJ – Adiel
- წლის ჯგუფი – Bambole di Pezza
- წლის ამომავალი ვარსკვლავი – ანჯელიკა ბოვე
- წლის აღმასრულებელი ხელმძღვანელი – ელეონორა რუბინი
წლევანდელ სიახლეებს შორისაა Spotify-ს ჯილდო EQUAL, რომელიც კოლექტივ Canta Fino a 10-ს გადაეცემა. ჯილდო კოლექტივის მნიშვნელოვან შემოქმედებით წვლილს აღნიშნავს ქალი არტისტების მხარდაჭერაში, იტალიურ მუსიკაში გენდერული სტერეოტიპების დაძლევასა და თანამშრომლობის ხელშეწყობაში.
2026 წლის ღონისძიების მიზანია, მუსიკის ინდუსტრია სხვადასხვა პერსპექტივიდან წარმოაჩინოს და ყურადღება გაამახვილოს არა მხოლოდ სცენაზე მდგომ არტისტებზე, არამედ იმ ადამიანებზეც, რომლებიც მუსიკას ყოველდღიურად ქმნიან, წერენ სიმღერებს, მუშაობენ პროდიუსერებად, ხელმძღვანელობენ პროცესებს და კულისებს მიღმა საქმიანობენ. ეს არის შესაძლებლობა შეიქმნას უფრო სრული წარმოდგენა იმ მრავალფეროვან პროფესიებზე, რომლებიც ამ ინდუსტრიას ქმნიან და მის განვითარებას უწყობენ ხელს.
2026 წლის გამოცემის პარტნიორებს შორის არის საავტორო უფლებების საზოგადოება SIAE (Società Italiana degli Autori ed Editori), რომელიც აქტიურად უჭერს მხარს მუსიკალურ ინდუსტრიაში მომუშავე ქალებს და შემოქმედებით საქმიანობას.
ღონისძიების ოფიციალური პარტნიორები არიან: Acqua Fiuggi და Roku Gin.
