ალანის მორისეტმა განაცხადა, რომ თავს პანსექსუალად მიიჩნევს. ეს ინფორმაცია მან პოდკასტში სტუმრობისას გაამხილა. მომღერალმა, რომელმაც ახლახან თავისი პირველი საშობაო ალბომი Good Weather for Immaculate Conception გამოსცა, Handsome Podcast-ში მიიღო მონაწილეობა, როგორც პოდკასტის პირველი ფიზიკური სტუმარი.
„ვწუხვარ იმ მამაკაცების გამო, რომლებმაც გული გატკინეს, მაგრამ არ ვწუხვარ იმ სიმღერების გამო, რომლებიც ამის შედეგად შეიქმნა. ისინი მართლაც შესანიშნავია,” – უთხრა მორისეტს ერთ-ერთმა წამყვანმა, კომიკოსმა ფორჩენ ფეიმსტერმა, რომელიც პოდკასტს ტიგ ნოტაროსა და მეი მარტინთან ერთად უძღვება. „რაღაც მომენტში ხომ არ გიფიქრია, რომ ამის გამო ლესბოსელი გამხდარიყავი?“
„მე პანსექსუალი ვარ, ასე რომ, დიახ“, – უპასუხა მორისეტმა. „ყველაფრისთვის ღია ვარ.”
GLAAD-ის განმარტებით, პანსექსუალი არის ადამიანი, რომელსაც შეუძლია განიცადოს ხანგრძლივი ფიზიკური, რომანტიკული ან ემოციური მიზიდულობა ნებისმიერი ადამიანის მიმართ, მისი გენდერული იდენტობის მიუხედავად. ტერმინი განსხვავდება ბისექსუალისგან. ბისექსუალობა გულისხმობს მიზიდულობას ერთზე მეტი გენდერის წარმომადგენელთა მიმართ, პანსექსუალობის შემთხვევაში კი ადამიანის გენდერი მიზიდულობის განმსაზღვრელი ფაქტორი არ არის.
შემდეგ ტიგ ნოტარომ ჰკითხა: „მოიცა, მართლა პანსექსუალი ხარ?“ რაც მორისეტმა დაადასტურა. ნოტარომ კი, რომელმაც ხუმრობით აღნიშნა, რომ გადაცემა ამ ინფორმაციით უნდა დაეწყოთ, აღნიშნა: „ეს აქამდე როგორ არ ვიცოდი?“ მორისეტმა კი უპასუხა: „ასეთი ამბების ეპილოგისთვის შემონახვა მიყვარს. მომწონს, ბოლოს ხალხს რომ ვაბნევ. არის ეს დამაბნეველი?”
ალანის მორისეტს Billboard 200-ის ჩარტის სამი ლიდერი ალბომი აქვს. მისი ერთ-ერთი ყველაზე ცნობილი სიმღერა Ironic 1996 წელს Hot 100-ის მეოთხე ადგილზე გავიდა. მორისეტი მუსიკოს მარიო ტრედვეიზე დაქორწინდა, რომელიც ცნობილია სასცენო სახელით Souleye. წყვილს სამი შვილი ჰყავს.
მორისეტის 14-სიმღერიანი საშობაო ალბომი Good Weather for Immaculate Conception 6 ნოემბერს გამოვიდა. ალბომის ერთ-ერთი მთავარი კომპოზიციაა Beautiful Star of Bethlehem, რომელიც მან ბრენდი კარლაილთან და სტივ მარტინთან ერთად ჩაწერა. მეორე სინგლის, To an Empath at Christmas Time-ის მუსიკალური ვიდეო კი 7 ნოემბერს გამოქვეყნდა.
ნახეთ ალანის მორისეტის სტუმრობა პოდკასტში:
