Carnival კანიე უესტის ერთ-ერთი ყველაზე წარმატებული ტრეკია. ის Billboard Hot 100-ის მუსიკალურ ჩარტებში პირველ ადგილს იკავებს. ახლახან არტისტმა ყველა თაყვანისმცემელს მადლობა გადაუხადა და აღნიშნა, რომ Carnival-ის წარმატება მათი დამსახურებაა. „ეს წარმატება იმ ადამიანებს ეძღვნება, ვინც სისტემის მანიპულაციას არ აყვნენ” – აღნიშნა Ye-მ (კანიე უესტი) ინსტაგრამზე გამოქვეყნებულ პოსტში. რეპერმა უცენზურო სიტყვებით მოიხსენია სპორტული კომპანია „ადიდასი”. აღსანიშნავია, რომ ამჟამად ეს პოსტი კანიე უესტის სოციალურო მედიის ანგარიშიდან წაშლილია.
Carnival-ის ჩარტების პირველ ადგილზე მოხვედრა უესტის შემოქმედებით კარიერაში აღსანიშნავი მოვლენაა. მუსიკოსი ბოლოს პირველ ადგილზე 2007 წელს მოხვდა, როდესაც კეტი პერისთან ერთად ჩაწერილი სიმღერა, ET გამოიცა.
კანიე უესტის მრავალწლიანი შემოქმედება ბევრ ჰიტს მოიცავს. ბოლო პერიოდში რეპერი არაერთ სკანდალში გაეხვა, რამაც მის მუსიკალურ კარიერას ჩრდილი მიაყენა. რეპერის ცხოვრებაში განსაკუთრებულად რთული პერიოდი 2016 წელს დაიწყო, როცა Saint Pablo-ს ტურნეს დროს გარკვეული ინციდენტები მოხდა. ამის შემდეგ უესტი საავადმყოფოშიც გადაიყვანეს და მისი ჯანმრთელობის მდგომარეობის გართულების ოფიციალურ მიზეზად დაღლილობა და დეჰიდრატაცია დაასახელეს. ამავე წელს არტისტს ბიპოლარული აშლილობის დიაგნოზი დაუსვეს.
აქედან რამდენიმე წლის შემდეგ უესტის ცხოვრება კიდევ ერთხელ მოექცა მედიის ყურადღების ცენტრში, როცა 2021 წელს ის და კიმ კარდაშიანი ერთმანეთს დაშორდნენ. ამას მოჰყვა Ye-ს (კანიე უესტი) დაპირისპირება ყოფილ ცოლთან, მისი მისამართით გამოთქმული შეურაცხმყოფელი განცხადებები და ბრალდებები, რომლებსაც რეპერი სოციალური მედიის მეშვეობით საჯაროდ აქვეყნებდა. უესტი ასევე დიდ სკანდალში გაეხვა, როცა ანტისემიტური განცხადებების გავრცელება დაიწყო. საბოლოოდ არტისტთან თანამშრომლობა არაერთმა კომპანიამ გაწყვიტა, მათ შორის იყო „ადიდასი”. ამ პროცესში კანიე უესტმა უამრავი მხარდამჭერი და ფანი დაკარგა.
2024 წლის თებერვალში მან რეპერ Ty Dolla Sign-თან ერთად სტუდიური ალბომი Vultures გამოსცა. კარიერის ახალი ეტაპის დაწყების პარალელურად კანიე უესტმა მსმენელების ახალი აუდიტორიაც შეიძინა, რომლებიც უფრო ტოლერანტულად ეკიდებიან მის საჯარო განცხადებებს, მათ შორის რადიკალურ პოზიციებს.
