გერმანელი გამომცემელი და რეჟისორი ანა მიულერი სოხუმის თეატრში ლექციას გამართავს

24 მაისს სოხუმის თეატრში აუდიტორიის წინაშე წარდგება ცნობილი ახალგაზრდა გერმანელი რეჟისორი და გამომცემელი ანა მიულერი. ის გამართავს ლექცია/დისკუსიას, რომელიც მისი მამის, მსოფლიოში ცნობილი დრამატურგის, ჰაინერ მიულერის ცხოვრებასა და შემოქმედებას ეხება.

ანა მიულერი 1992 წელს ბერლინში დაიბადა. როგორც უკვე ვახსენეთ, მამა სახელგანთქმული ჰაინერ მიულერია, დედა კი – ფოტოგრაფი ბრიგიტე მარია მაიერი. 2017-2020 წლებში მიულერმა ნიუ-იორკის კინოაკადემიაში დოკუმენტური ფილმის მიმართულებით მიიღო განათლება.

კინემატოგრაფიაში მოღვაწეობა ანამ საკმაოდ მნიშვნელოვანი ნამუშევრით დაიწყო – სადებიუტო დოკუმენტური ფილმი სწორედ მამას მიუძღვნა. ის 3 წლის იყო, როცა ჰაინერ მიულერი გარდაიცვალა და რეჟისორმა ფილმი დედის მოგონებების მიხედვით გადაიღო. აღსანიშნავია, რომ კინემატოგრაფიასთან მჭიდრო კავშირი აქვს ანა მიულერის დედასაც, ბრიგიტე მარია მაიერს, რომელმაც სხვადასხვა დროს რამდენიმე ფილმზე იმუშავა. ანა მიულერის თქმით, ჰაინერ მიულერის შესახებ ფილმი ერთის მხრივ მამის უკეთ გაცნობა იყო და მეორეს მხრივ – დედასთან კოლაბორაცია.

2020 წლის ინტერვიუში, როცა ჯერ კიდევ სადებიუტო ფილმზე მუშაობდა, ანამ თავის საოცნებო პროექტებზე ისაუბრა. მისი თქმით, ფილმი, რომლის გადაღებაც ყველაზე მეტად სურს, არის „თამაში ჭვავის ყანაში”. ანამ ასევე აღნიშნა, რომ ეს საოცნებო, თუმცა არარეალური პროექტია, რადგან ჯერომ სელინჯერის ნების მიხედვით, მისი ეკრანიზაციის უფლება ვერავინ მიიღო.

სწორედ „თამაში ჭვავის ყანაში” იქცა ანა მიულერისათვის კიდევე ერთი მიმართულებით განვითარების ინსპირაციად. მიულერი ასევე არის გერმანული საგამომცემლო სახლის – Herzstückverlag-ის დამფუძნებელი.

„ვფიქრობ, დროსთან ერთად უფრო მარტივი ხდება, რომ ქალმა შემოქმედებით სფეროში იმუშაოს. თუმცა, ჯერ კიდევ არსებობს გარკვეული საზღვრები და სტერეოტიპები. მიუხედავად ყველაფრისა, დღეს მეტი თავისუფლებაა და შესაძლებელია შემოქმედებით საკუთარი სამყარო შექმნა”- ამბობს ანა მიულერი ერთ-ერთ ინტერვიუში.

სოხუმის თეატრში 24 მაისს დაგეგმილ საღამოზე აუდიტორიას შესაძლებლობა ექნება, არა მხოლოდ ანა მიულერი გაიცნოს, არამედ ჰაინერ მიულერის ცხოვრებასა და შემოქმედებაზე საინტერესო დეტალები გაიგოს. შეხვედრის მოდერატორი დრამატურგი, რეჟისორი და მთარგმნელი გიორგი ჯამბურია იქნება.

ამავე საღამოზე ანა მიულერი წაიკითხავს ჰაინერ მიულერის „ჰამლეტ-მანქანას”, ნიკოლაუს რექსთროთი კი ფორტეპიანოზე მუსიკალურ ინტერლუდიებს დაუკრავს. შესრულდება არნოლდ შონბერგისა და ვალენტინ სილვესტროვის ნაწარმოებები. ასევე შედგება სერგეი რახმანინოვის ნაწარმოების (ფრაგმენტები საფორტეპიანო ციკლიდან „მუსიკალური მომენტები”, თხზ. 16) მსოფლიო პრემიერა.

შეხვედრაზე დასასწრები ბილეთების შესაძენად ეწვიეთ ბმულს.