რამდენიმე კვირის წინ, ლოს ანჯელესში ტყის ხანძრების კატასტროფის ფონზე, გრემის დაჯილდოების ცერემონიის გამართვა წარმოუდგენლად მიაჩნდათ. ხმის ჩამწერმა აკადემიამ დიდ ზეწოლას გაუძლო, გადადების და გაუქმების მოთხოვნების პარალელურად, ძალისხმევა არ დაიშურა და 67-ე ყოველწლიური გრემის დაჯილდოება დააანონსა.
2 თებერვალს, ლოს ანჯელესის Crypto.com Arena-ს სცენიდან გრემის დაჯილდოების ცერემონიას ტრევორ ნოა გაუძღვება. ღონისძიება პირდაპირი ეთერის საშუალებით, CBS-ზე გავა, შოუს პირდაპირი ტრანსლაციის ყურება კი Paramount+-ზეც იქნება შესაძლებელი.
აღსანიშნავია, რომ წელს დაჯილდოება განსაკუთრებულ ყურადღებას ახალ არტისტებზე ამახვილებს. წლის საუკეთესო ახალი შემსრულებლის ნომინანტებიდან შვიდი: ბენსონ ბუნი, ჩაპელ როანი, დოჩი, რეი, საბრინა კარპენტერი და ტედი სვიმსი – სცენაზე გამოვლენ. მერვე ნომინანტი, Khruangbin, ჯერ შემსრულებლად არ დასახელებულა.
გრემის დაჯილდოებაზე სხვა შემსრულებლებს შორის არიან: ბილი აილიში (რომელმაც წლის საუკეთესო ახალი არტისტის ჯილდო ხუთი წლის წინ მოიპოვა), ლედი გაგა და ბრუნო მარსი, Charli XCX და შაკირა. ლედი გაგასა და ბრუნო მარსის გამოსვლა პარასკევს, ხმის აკადემიის სოციალურ ქსელებში დაანონსდა და ის „ლოს ანჯელესსა და ხანძრისგან დაზარალებულებს“ მიეძღვნება.
ტოპ-ნომინანტებიდან, რომლებსაც სცენაზე გამოსვლა ჯერ არ დაუდასტურებიათ, არიან ბიონსე, კენდრიკ ლამარი და ტეილორ სვიფტი. ბიონსე წლევანდელი გრემის ლიდერი 11 ნომინაციით გახდა. ტეილორ სვიფტი კი ექვს ნომინაციას ფლობს. CBS-ის ეთერში გასული ვიდეოანონსიდან გულშემატკივარმა შეიტყო, რომ ვარსკვლავები გრემის დაჯილდოებას დაესწრებიან, თუმცა, მათი სცენაზე გამოსვლა ჯერ დადასტურებული არ არის.
კენდრიკ ლამარმა, რომელსაც წელს შვიდი ნომინაცია აქვს, ბოლოს გრემის სცენაზე 2018 წელს იმღერა, როდესაც შოუ U2-სთან და დეივ შაპელთან ერთად გახსნა. წელს, გრემის დაჯილდოებაზე, ნაკლებად სავარაუდოა კენდრიკ ლამარის გამოსვლა, რადგან 9 თებერვალს ის Super Bowl-ის მთავარი შემსრულებელია.
აღსანიშნავია, რომ წელს გრემის დაჯილდოება განსაკუთრებული მისიის მატარებელია, რომელიც ლოს ანჯელესში ხანძრისგან დაზარალებულთა დასახმარებლად თანხების შეგროვებას და პირველად დახმარებაში ჩართული გმირ მეხანძრე-მაშველების პატივისცემას მიეძღვნება.
ტეილორ სვიფტი, რომელმაც 2024 წლის გრემის დაჯილდოებაზე წლის ალბომის ნომინაციაში გაიმარჯვა და ვიქტორია მონე, რომელმაც ამავე წელს საუკეთესო ახალი არტისტის ჯილდო მიიღო, წლევანდელ ღონისძიებაზე პრეზენტატორებად წარდგებიან.
ხმის ჩამწერმა აკადემიამ პარასკევს გრემის დაჯილდოების სხვა წამყვანებიც დაასახელა, ესენი არიან: Red Hot Chili Peppers-ის წევრები ენტონი კიდისი და ჩედ სმიტი, Cardi B, გლორია ესტეფანი, ოლივია როდრიგო, ქუინ ლატიფა, SZA და უილ სმიტი.
უილ სმიტი პატივს მიაგებს გრემის ლეგენდა ქუინსი ჯონსს, რომელიც ნოემბერში, 91 წლის ასაკში გარდაიცვალა. ქუინსი ჯონსს მუსიკალური კარიერის განმავლობაში 28 გრემი აქვს მიღებული. ის იყო მეგობარი და მენტორი არაერთი გამორჩეული არტისტისთვის, მათ შორის, ჰერბი ჰენკოკისთვის, სტივი უანდერისთვის, ჯონ ლეჯენდისთვის და ჯეიკობ კოლიერისთვის.
ტრევორ ნოასთვის წელს მეხუთე წელია გრემის დაჯილდოების წამყვანის ამპლუაში. ტრევორ ნოა ასევე ნომინირებულია საუკეთესო კომედიური ალბომის კატეგორიაში Where Was I-სთვის, გამარჯვების შემთხვევაში კი, ის გრემის მეორე წამყვანი გახდება, რომელმაც შოუს წაყვანის დღეს გრემი დაიმსახურა. პირველად ეს შემთხვევა 1980 წელს მოხდა, როდესაც დაჯილდოების ცერემონიის წამყვანმა კენი როჯერსმა გრემი მიიღო.
67-ე ყოველწლიურ გრემის დაჯილდოებას მეოთხე წელია, რაც Fulwell 73 Productions უწევს პროდიუსინგს Recording Academy-სთვის. დაჯილდოების ცერემონიის აღმასრულებელი პროდიუსერები არიან ბენ უინსტონი, რაჯ კაპური და ჯესი კოლინსი.
ნახეთ გრემის მთავარ ცერემონიაზე მონაწილე შემსრულებლებისა და წამყვანების სრული სია:
შემსრულებლები:
ბენსონ ბუნი
ბილი აილიში
ჩაპელ როანი
Charli XCX
დოჩი
ლედი გაგა & ბრუნო მარსი
რეი
საბრინა კარპენტერი
Shaboozey
შაკირა
ტედი სვიმსი
შემსრულებლები საპატიო მიძღვნის კატეგორიაში:
ბრედ პეისლი
ბრიტანი ჰოვარდი
კრის მარტინი
სინთია ერივო
ჰერბი ჰენკოკი
ჯეიკობ კოლიერი
ჟანელ მონე
ჯონ ლეჯენდი
ლეინი უილსონი
შერილ კროუ
სენტ ვინსენტი
სტივი უანდერი
წამყვანები:
ენტონი კიდისი & ჩედ სმიტი (Red Hot Chili Peppers)
Cardi B
გლორია ესტეფანი
ოლივია როდრიგო
ქუინ ლატიფა
SZA
ტეილორ სვიფტი
ვიქტორია მონე
უილ სმიტი
