16 აპრილს ნიუ-იორკში ნინო ქათამაძის კონცერტი გაიმართება. ქართველი მომღერალი ამერიკელი მსმენელის წინაშე ჯგუფ „ინსაითთან” და ნიკოლოზ რაჭველთან ერთად წარდგება. გამხსნელ აქტს კი ამერიკაში მცხოვრები ქართველი ავტორ-შემსრულებელი Manana შეასრულებს. კონცერტი ნიუ-იორკის ერთ-ერთ ყველაზე პრესტიჟულ მუსიკალურ სივრცეში – Jazz at Lincoln Center-ში შედგება. ღონისძიების ორგანიზატორია Lyra Entertainment Group, რომელიც ამერიკაში მოღვაწე ქართველმა ჯაზმუსიკოსმა ბაჩა მძინარაშვილმა და გია ტყებუჩავამ დააარსეს. კომპანია მუსიკალურ პროექტებს მთელი მსოფლიოს მასშტაბით ახორციელებს.
ბაჩა მძინარაშვილი – Lyra Entertainment Group-ის დამფუძნებელი:
„Jazz at Lincoln Center ერთ-ერთი ყველაზე მნიშვნელოვანი მუსიკალური ორგანიზაციაა როგორც ნიუ-იორკში, ასევე მთელ ამერიკაში, რომლის მუსიკალური დირექტორიც გახლავთ ლეგენდარული ამერიკელი მესაყვირე უინტონ მარსალისი. ამჯერად ნინო წარდგება Jazz at Lincoln Center-ის ასევე ერთ-ერთ ყველაზე ცნობილ დარბაზში, Rose Hall-ში, სადაც დაუკრავთ ჯაზის ისეთ ლეგენდებს, როგორებიც არიან მაილს დევისი, ლუი არმსტრონგი, ჰერბი ჰენკოკი, ჩიკ კორეა და სხვები. 16 აპრილის კონცერტზე 1200 სტუმარს ველოდებით, რომელთაც ნინო და მისი ბენდი, ნიკოლოზ რაჭველთან ერთად, მართლაც განსაკუთრებულ და დაუვიწყარ საღამოს აჩუქებენ.”
