სელენა გომესი, 33 წლის მომღერალი და მსახიობი, სოლო კარიერის დაწყებამდე პოპ-როკ ჯგუფის Selena Gomez & the Scene სოლისტი იყო. 2009-2012 წლებში ბენდმა სამი სტუდიური ალბომი გამოსცა. ახლა კი გომესი იმ პერიოდიდან ერთ განსაკუთრებულ სიმღერას იხსენებს.
პოდკასტში Therapuss, რომელიც 6 აგვისტოს გამოვიდა, სელენამ წამყვან ჯეიკ შეინს უთხრა, რომ მისი საყვარელი სიმღერა ჯგუფის პერიოდიდან არის Who Says. ეს სიმღერა არის მთავარი სინგლი ჯგუფის ბოლო ალბომიდან, When the Sun Goes Down. 2011 წელს სიმღერა Billboard Hot 100 ჩარტში 21-ე ადგილზე მოხვდა.
„ყველაზე ემოციური მომენტია, როცა ამ სიმღერას ვასრულებ. საიდუმლოდ გეტყვით, ერთადერთი მიზეზი, რის გამოც ოდესმე ტურზე წასვლაზე მიფიქრია, სწორედ მისი შესრულებაა,“ – განაცხადა გომესმა, რომელიც 2016 წლის შემდეგ ტურზე არ ყოფილა.
სელენა ასევე ამბობს, რომ მზად არის სიმღერის ხელახლა ჩასაწერად, რადგან ორიგინალ ვერსიაში მისი ხმა ძალიან ახალგაზრდული იყო.
„ხელახლა უნდა ჩავწერო, აუცილებლად!“ – თქვა ვარსკვლავმა. გომესმა გაიხსენა, რომ ერთხელ, როცა საზღვარგარეთ იყო, რადიოში Who Says მოისმინა, ემოციები ვერ დამალა და ცრემლები მოერია. „ვიფიქრე, რატომ მიჩუყდება გული ჩემი საკუთარი სიმღერის მოსმენისას? ეს იმიტომ ხდებოდა, რომ ამ სიმღერაში ჩემი „პატარა მე” იყო და მის გზავნილს დღემდე ვგრძნობ.“
ინტერვიუს სხვა ნაწილებში სელენამ ისაუბრა ტეილორ სვიფტთან შეხვედრაზე. ვარსკვლავებმა ერთმანეთი მაშინ გაიცნეს, როცა ორივე Jonas Brothers-ის წევრებთან დაშორების პროცესში იყვნენ.
„ვამბობთ, რომ იმ პერიოდიდან საუკეთესო, რაც დაგვრჩა, ერთმანეთია. ჩვენ უახლოესი მეგობრები გავხდით, ერთად გავიარეთ დაშორება ისე, როგორც გოგონებმა უნდა გადაიტანონ. შემდეგ კი მხარს ვუჭერდით ერთმანეთს ცხოვრების ყველა სიხარულსა და სირთულეში. ახლა, 16 წლის შემდეგ, აქ ვართ.“
ცოტა ხნის წინ სელენა გომესმა გამოსცა ერთობლივი ალბომი საქმროსთან, ბენი ბლანკოსთან ერთად. ალბომი, სახელწოდებით I Said I Love You First, მაისში გამოვიდა და Billboard 200 ჩარტში მეორე ადგილი დაიკავა.
