27 აგვისტოს ინსტაგრამზე არიანა გრანდემ ახალი ვიდეო გამოაქვეყნა, სადაც შემდეგი შინაარსის მესიჯი ვრცელდება: „დაზიანებული ფაილი ნაპოვნია და დაკორექტირებულია.” შემდეგ კადრი იცვლება და ჩნდება წარწერა: „შევხვდებით მომავალ წელს… განცხადება იტვირთება…”
გრემის მფლობელმა არტისტმა დამატებით დეტალები არ გაამხილა. გულშემატკივრების ვარაუდით, ეს, შესაძლოა, მის მეშვიდე ალბომს, Eternal Sunshine-ს უკავშირდება, რადგან ვიდეო არიანა გრანდემ თავის მეორე ინსტაგრამ გვერდთან, Brighter days-თან გაერთიანებული პოსტის სახით გამოაქვეყნა. სიუჟეტი და ვიზუალი საკმაოდ ჰგავს Eternal Sunshine: Brighter Days Ahead-ის მოკლემეტრაჟიანი ფილმის ესთეტიკას, რომელიც აპრილში ალბომის დელუქს ვერსიასთან ერთად გამოვიდა.
მიუხედავად ამისა, მხოლოდ ამ მინიშნებებით საკმაოდ რთულია, გამოიცნო, თუ რას გეგმავს სამომავლოდ არტისტი. სავარაუდოდ, არიანა გრანდე Eternal Sunshine-ის მხარდასაჭერ ტურნეს აანონსებს. თუმცა მომღერალმა განაცხადა, რომ უახლოეს მომავალში ტურნეს არ გეგმავდა, ცოტა ხნის წინ კი ახალი განცხადება გაავრცელა, სადაც იგი ამბობს, რომ მუშაობს გეგმაზე, რათა მომავალ წელს გულშემატკივრებისთვის იმღეროს.
Eternal Sunshine თავდაპირველად 2024 წლის მარტში გამოვიდა. ალბომში შესული ორი ჰიტი Yes, And? და We Can’t Be Friends (Wait for Your Love) Billboard Hot 100-ზე პირველ ადგილზე გავიდა, თავად ალბომი კი სამი კვირის განმავლობაში Billboard 200-ის სათავეში იმყოფებოდა. მას შემდეგ, რაც ნოემბერში Wicked-ის პრემიერა შედგა, არიანამ ალბომის დელუქს ვერსიაც გამოსცა, რითაც Eternal Sunshine-ს ახალი სიცოცხლე შთაბერა.
ნახეთ არიანა გრანდეს ახალი პოსტი:
