რეჟისორი დავით დოიაშვილი „ახალი ქართული თეატრის“ სპექტაკლით სცენას „ზაფხულის ღამის სიზმრით“ უბრუნდება. სპექტაკლის პრემიერა 14-15 ოქტომბერს სამეფო უბნის თეატრში შედგება, ბილეთების გაყიდვა კი 30 სექტემბრიდან დაიწყება.
„შექსპირის კომედიაში შეყვარებულები, მმართველები და მსახიობები სამყაროთა შორის საზღვრებს ისე კვეთენ, როგორც მხოლოდ სიზმარში ან თეატრშია შესაძლებელი. ისინი უღრან ტყეში იკარგებიან, როგორც რეალური ცხოვრების ქაოსში, სადაც ნამდვილი და ყალბი ამბები, სიზმარი, სიყვარული, ოცნება და რეალობა ერთმანეთშია გადახლართული და თანამედროვე ღამის კოშმარს ქმნის,“ – ვკითხულობთ სპექტაკლის აღწერაში.
View this post on Instagram
„ზაფხულის ღამის სიზმარი“ სამეფო უბნის თეატრისა და „ახალი ქართული თეატრის“ კოპროდუქციაა. სპექტაკლში მონაწილეობენ: გივიკო ბარათაშვილი, ნიკუშა ბაქრაძე, სალომე თოფურია, მანუ თავაძე, სანდრო სამხარაძე, ლაშა მებუკე, ტასო ჭანტურაია, გოგა გველესიანი, ნიკო თავაძე, ნინო კასრაძე, ნანკა კალატოზიშვილი, ტიტე კომახიძე, ნატა მურვანიძე, ანდრო ჭიჭინაძე.
სპექტაკლის სცენოგრაფია ქეთი ნადიბაიძეს ეკუთვნის, კოსტიუმები – სიმონ მაჩაბელს, მუსიკა – გიორგი ცაგარელს. თარგმანის ავტორი ვახტანგ ჭელიძეა, ტექსტის ადაპტაციაზე კი დავით გაბუნიამ იმუშავა. სპექტაკლის პროდიუსერი ლევან ხეთაგურიაა.
მეტი დეტალისათვის ეწვიეთ ბმულს.
