მორისიმ 2026 წლის ტურნეს პირველი კონცერტები გააუქმა, რომლებიც იანვრის დასაწყისში კალიფორნიაში იყო დაგეგმილი.
მომღერალი მსმენელის წინაშე 3 იანვარს უნდა წარმდგარიყო, თუმცა ტურნეს განრიგში მითითებულია, რომ კონცერტი განუსაზღვრელი ვადით გადაიდო.
საკონცერტო დარბაზის ცნობით, გადაწყვეტილების მიზეზი „დანიშნულ მედიკამენტზე გვერდითი მოვლენის განვითარება გახდა”. სხვა დეტალები ამ ეტაპზე არ სახელდება.
ასევე გაუქმდა მომღერლის მეორე კონცერტიც, რომელიც 6 იანვარს იყო დაგეგმილი. შოუს ახალი თარიღი არც ამ შემთხვევაშია მითითებული.
მოვლენების ამგვარად განვითარება ერთგვარად განაგრძობს მორისის ლაივ კონცერტების გაუქმების ბოლო წლების ტენდენციას. ჯანმრთელობის მდგომარეობის, განრიგის შეუთანხმებლობისა თუ დარბაზთან დაკავშირებული პრობლემების გამო, შოუების გადადება და გაუქმება მომღერლის არაერთ ტურნეს შეეხო.
სექტემბერში მუსიკოსმა ოტავას კონცერტი უსაფრთხოების მიზნით გააუქმა, რაც Bluesky-ზე გამოქვეყნებულ მუქარას უკავშირდებოდა. მომდევნო თვეში ასევე გაუქმდა თურქეთში დაგეგმილი კონცერტი საზოგადოების უკმაყოფილების ფონზე, რაც მორისის ისრაელის მხარდამჭერ განცხადებას მოჰყვა.
ნოემბერში მომღერალმა გააუქმა სამხრეთამერიკული ტურნე და გადაწყვეტილება „უკიდურესი გადაღლილობით” ახსნა. დეკემბერში კი ასევე მოულოდნელად გააუქმა მისი პირველი კონცერტი დომინიკის რესპუბლიკაში.
ამ ეტაპზე მორისის შემდეგი კონცერტი 10 იანვარს ტეხასში, სან-ანტონიოშია დაგეგმილი, სადაც მომღერალი 15 წელიწადზე მეტია, არ გამოსულა. აღნიშნული კონცერტიც გადადებული შოუების რიგს მიეკუთვნება, რომელიც თავდაპირველად 8 მაისს უნდა გამართულიყო. მანამდე კი, 2016-2017 წლებში, სან-ანტონიოში დაგეგმილი კონცერტებიც გაუქმდა.
იანვრის გაუქმებულ კონცერტებზე დამატებითი დეტალები ამ ეტაპზე არ ვრცელდება. საჯარო კომენტარი არც თავად მორისს გაუკეთებია.
