Bridgerton-ის მეოთხე სეზონის მეორე ნაწილი 26 თებერვალს Netflix-ზე გამოვა. Billboard ექსკლუზიურად აქვეყნებს იმ ცნობილი ჰიტების შთამბეჭდავი ქავერების ჩამონათვალს, რომლებიც სერიალის ფინალურ ეპიზოდებში გაჟღერდება. ეს მუსიკალური კომპოზიციები ბენედიქტ Bridgerton-ის (ლუკ ტომპსონი) და სოფი ბეკის (იერინ ჰა) „კონკიას“ მოტივებზე შექმნილი სასიყვარულო ისტორიის კულმინაციურ ეპიზოდებს გააფორმებს.
სეზონის მეორე ნახევარი, კერძოდ კი 405-ე ეპიზოდი არა ერთი ან ორი, არამედ სამი გამორჩეული ქავერით გაიხსნება:
Charli XCX-ის სიმღერა – 360, ალბომიდან Brat (რომელმაც 2024 წლის აგვისტოში Billboard Hot 100-ში 41-ე ადგილი დაიკავა), პიტერ გრეგსონის ინტერპრეტაციით; ბილი აილიშის Birds of a Feather, ჰიტი ალბომიდან Hit Me Hard and Soft (2024 წლის ოქტომბრის მონაცემებით ტრეკმა ჩარტებში მე-2 ადგილი დაიკავა), Gemini Strings-ის შესრულებით და Teddy Swims-ის Lose Control, მომღერლის N1 ჰიტი, რომელსაც Vitamin String Quartet ასრულებს.
შემდეგი ეპიზოდი რეტრო სტილში The Cars-ის 1978 წლის ჰიტის, Just What I Needed (N27) და Sting-ის Fields of Gold-ის (N 23, 1993) ქავერებს წარმოგვიდგენს, რომლებიც Altum Quartet-მა და Music Lab Collective-მა შეასრულეს.
ერთ ეპიზოდში ქავერ ვერსიების ნაცვლად კომპოზიტორ კრის ბაუერსის საუნდტრეკი შემოდის, თუმცა ქავერ ვერსიები 408-ე ეპიზოდში ბრუნდება, სადაც Camila Cabello-ს Hot 100-ის მე-6 ადგილზე მყოფი ჰიტის Never Be the Same და Lord Huron-ის The Night We Met-ის (N 84) ქავერებია წარმოდგენილი. ქავერებს Strings From Paris და ჯონი ფულერი ასრულებენ.
მეორე ნაწილის სრული საუნდტრეკი Capitol Records-ის მეშვეობით სტრიმინგ პლატფორმებზე იმავე დღეს იქნება ხელმისაწვდომი, რა დროსაც Netflix-ზე ფინალური ეპიზოდი გამოვა.
„ჩვენ მუდმივად ვეძებთ სიმღერებს, რომლებიც პერსონაჟების ემოციებს ემთხვევა და საუკეთესოდ წარმოაჩენს მაყურებლისთვის მათ განცდებს. მეოთხე სეზონის პრემიერაში განსაკუთრებული აქცენტი სამ სიმღერაზე გაკეთდა. მოგვიანებით ჩნდება მელოდიები, რომლებიც ამ მომენტს ეხმიანება, მაგალითად ტეილორ სვიფტის Enchanted 402 ეპიზოდში, ასევე არის მომენტი, სადაც ამ ადამიანებს ერთად ყოფნა სურთ, თუმცა საზოგადოება ამის ნებას არ რთავს, ეს ისეთ სიმღერებში აისახება, როგორებიცაა Olivia Rodrigo-ს Bad Idea Right? 404 ეპიზოდში და Lose Control.” – განუცხადა Billboard-ს Bridgerton-ის მუსიკალურმა ხელმძღვანელმა ჯასტინ კამპსმა.
რაც შეეხება იმ ჰიტებს, რომლებიც სეზონის მეორე ნაწილში გაჟღერდება, კემპსი აღნიშნავს, რომ ისინი არაჩვეულებრივია: „დიდი პატივია, რომ ასეთი ნიჭიერი არტისტები ამ სეზონისთვის ქავერ ვერსიებს ქმნიან. მეორე ნაწილი განსაკუთრებულია იმით, რომ ქავერების უმეტესობა პირველად სწორედ სერიალში გაჟღერდება. გულშემატკივრებს მათი წინასწარ მოსმენის შესაძლებლობა არ ექნებათ და 26-ში, ეპიზოდის გამოსვლისას, ბუნებრივად აღმოაჩენენ მათ. ასე რომ, მაყურებელს წინ საოცრად კარგი ქავერ-ვერსიები ელოდება, განსაკუთრებით აღსანიშავია Never Be the Same და The Night We Met. ძალიან მიყვარს მეორე ნაწილის ქავერები – ამის გამეორება მუდმივად შემიძლია. ” – აღნიშავს ჯასტინ კამპსი.
Netflix-ის სერიალების მუსიკალური განყოფილების დირექტორი ალექსანდრა პაცავასი ასევე ხაზს უსვამს Bridgerton-ში გამოყენებული ჰიტების მნიშვნელობას. „ჩვენი მთავარი მიზანი ყოველთვის იყო ის, რომ მუსიკა სერიალის გულისცემად ქცეულიყო. შეგვექმნა რაღაც განსაკუთრებული და წარმოგვედგინა იმ სიმღერების ახლებური ინტერპრეტაციები, რომლებიც გულშემატკივრებისთვის ასე ნაცნობი და საყვარელია. ამ მიდგომამ კიდევ უფრო მეტი გააკეთა, ვიდრე უბრალოდ სიუჟეტის გამრავალფეროვნებაა. Bridgerton-მა მნიშვნელოვანი გავლენა იქონია კულტურაზე, კლასიკურ და პოპ-მუსიკას შორის ერთგვარი ხიდი შექმნა“ – განუცხადა მან Billboard-ს.
Netflix-ის მონაცემებით, მას შემდეგ, რაც 29 იანვარს მეოთხე სეზონის პირველი ნაწილი გამოვიდა, Spotify-ზე Bridgerton-ის ოფიციალური ფლეილისტის სტრიმინგი 271%-ით გაიზარდა.
ალექსანდრა პაცავასი დასძენს, რომ: „ინსტრუმენტული ქავერის ნამდვილი მაგია ქვეცნობიერშია, თქვენ გესმით სიმღერის ტექსტი მაშინაც კი, როდესაც მას ხმამაღლა არავინ მღერის.“
დაელოდეთ 26 თებერვალს და მოუსმინეთ Bridgerton-ის ორკესტრულ ქავერებს, როდესაც Netflix-ზე მეოთხე სეზონის მეორე ნაწილი გამოვა.
