Bedford Falls-მა ახალი სიმღერა – VICI VICI VICI წარადგინა. ბენდმა სინგლი ვიზუალურ ნამუშევართან ერთად გამოაქვეყნა. სიმღერა Bedford Falls-ის მომავალი ალბომის, Lazy Bones-ის ნაწილია.
Lazy Bones ჯგუფმა 2025 წელს დააანონსა. მას შემდეგ ჯგუფი ალბომიდან სინგლებს მსმენელს პერიოდულად უზიარებს. Lazy Bones-ს ლეიბლი Stockton Records გამოსცემს.
2025 წლის დეკემბერში Bedford Falls ჟურნალ Billboard Georgia-ს რედაქტორის წარდგენით გლობალურ Billboard-ზე მოხვდა. მსოფლიოში ყველაზე გავლენიანი მუსიკალური ჟურნალის მეშვეობით, ქართული ჯგუფი მრავალმილიონიან აუდიტორიას გაეცნო. სტატიაში ბენდის წევრებმა Lazy Bones-ის კონცეფციაზეც ისაუბრეს და აღნიშნეს, რომ ალბომი 2025 წლის ემოციური ანარეკლია და გამოხატავს ერთი მხრივ უიმედობის განცდას და იმავდროულად, რთულ პერიოდში სიყვარულის შენარჩუნების მცდელობას.
Bedford Falls 2014 წელს შეიქმნა. ბენდის შემადგენლობაში არიან: დათო (ვოკალი), მიხო (გიტარა), სანდრო (დრამი და ბექვოკალი) და მიგრო (ბასი). შექმნისთანავე ჯგუფმა სწრაფად დაიმკვიდრა ადგილი სცენაზე და ერთ-ერთ გამორჩეულ მუსიკალურ კოლექტივად ჩამოყალიბდა.
ბენდის სახელწოდება შთაგონებულია ფრენკ კაპრას საკულტო ფილმით It’s a Wonderful Life, რომლის მოქმედებაც გამოგონილ ქალაქში – Bedford Falls-ში ვითარდება. ამ ქალაქის იდეა ჯგუფის იდენტობის მნიშვნელოვან ნაწილად იქცა, რადგან Bedford Falls არის ადგილი, სადაც ადამიანების ცხოვრება ერთმანეთთან მჭიდროდ არის დაკავშირებული.
