Ye-მ SoFi Stadium-ზე გამართულ თავის მეორე შოუზე მიწვეული არტისტების ვარსკვლავური შემადგენლობა კიდევ უფრო გააძლიერა.
48 წლის ჰიპ-ჰოპ არტისტი, რომელიც ადრე კანიე უესტის სახელით იყო ცნობილი, 3 აპრილს ინგლვუდში მდებარე SoFi Stadium-ის სცენაზე მეორე შოუთი დაბრუნდა, რომლის ბილეთები სრულად გაიყიდა. მან ფანები არაერთი სტუმრით გააოცა, მათ შორის იყვნენ ლორინ ჰილი და ტრევის სკოტი.
70 000-იანი ტევადობის სტადიონზე გამართული შოუს შუა ნაწილში Ye-მ სცენაზე ჰილი მოიხმო, რომელიც კვამლის სქელი ღრუბლიდან გამოჩნდა და მასთან ერთად All Falls Down შეასრულა. ტრეკში, რომელმაც 2004 წელს Billboard Hot 100-ში მე-7 პოზიციას მიაღწია, გამოყენებულია ჰილის 2002 წლის სიმღერის – Mystery of Iniquity-ის სემპლი.
ჰილი სცენაზე რამდენიმე მუსიკალური ნომრის განმავლობაში დარჩა. მან შეასრულა Doo Wop (That Thing), რომელიც უესტის Believe What I Say-ში გადაიზარდა. მოგვიანებით მას სცენაზე თავისი შვილები – ზაიონ მარლი და YG მარლი შეუერთდნენ. მათ შეასრულეს სიმღერები: Heartbeat, Crisis და Praise Jah in the Moonlight. ამ უკანასკნელის თანაავტორები YG და ლორინ ჰილი თავად არიან.
გასულ წელს, როცა Ye-ს ჯერ კიდევ არ ჰქონდა გამოცემული ალბომი Bully, ნამუშევარს ჰილის 1998 წლის საკულტო ალბომს – The Miseducation of Lauryn Hill-ს ადარებდა. „ეს ჩემთვის უფრო მეტად ლორინ ჰილის ალბომის გამოძახილია,” – თქვა უესტმა ერთ-ერთ ინტერვიუში.
3 აპრილს შოუს, დასაწყისში, Ye-მ სცენაზე ტრევის სკოტიც მიიწვია. რეპერებმა ერთად შეასრულეს Bully-ს წამყვანი სინგლი – Father. სკოტი ნიღაბს ატარებდა და ეცვა მაისური, რომელზეც Unsane ეწერა. მან ასევე შეასრულა თავისი ჰიტი Fein, ალბომიდან – Utopia.
სხვა სტუმრებს შორის იყვნენ CeeLo Green და უესტის 12 წლის ქალიშვილი ნორს უესტი, რომელმაც რეპის პარტია შეასრულა ტრეკებში – Bless Me და Piercing on My Hand. All the Love-ის შესასრულებლად კი სცენაზე ანდრე ტრაუტმანიც გამოვიდა. როგორც ჩანს, Bully-ს გამოშვების შემდეგ, Ye მთელ მსოფლიოში გეგმავს შოუებს. ლონდონში ის 10-12 ივლისს დაანონსებული Wireless Festival-ის ჰედლაინერიც იქნება. 2014 წლის შემდეგ, ეს იქნება მისი პირველი შოუ დიდ ბრიტანეთში. ასევე ივლისში უესტს დაგეგმილი აქვს კიდევ ერთი შოუ იტალიაში.
