ჯგუფმა Bedford Falls ახალი მუსიკალური ვიდეო გამოაქვეყნა. კლიპი გადაღებულია სიმღერაზე, სახელწოდებით „კიდობანი“, რომელიც შესულია ბენდის ახალ ალბომში – Lazy Bones. ვიდეოს ფროდაქშენზე Stockton Records-მა იმუშავა, რეჟისორი კი გიორგი მეშველიანია (avi.musaifi). კლიპში მთავარ პერსონაჟს ახალგაზრდა მსახიობი ლაშა მებუკე ასრულებს.
Bedford Falls-მა ალბომი Lazy Bones 24 მარტს გამოსცა და ის 12 სიმღერას აერთიანებს. 24 აპრილს ჯგუფი Factory Tbilisi-ის სივრცეში კონცერტს გამართავს, რომელზეც ახალი ალბომის სიმღერები შესრულდება.
Bedford Falls 2014 წელს შეიქმნა. ბენდის შემადგენლობაში არიან: დათო (ვოკალი), მიხო (გიტარა), სანდრო (დრამი და ბექ-ვოკალი) და გიგო (ბასი). შექმნისთანავე ჯგუფმა სწრაფად დაიმკვიდრა ადგილი სცენაზე და ერთ-ერთ გამორჩეულ მუსიკალურ კოლექტივად ჩამოყალიბდა.
ბენდის სახელწოდება შთაგონებულია ფრენკ კაპრას საკულტო ფილმით It’s a Wonderful Life, რომლის მოქმედებაც გამოგონილ ქალაქში – Bedford Falls-ში ვითარდება. ამ ქალაქის იდეა ჯგუფის იდენტობის მნიშვნელოვან ნაწილად იქცა, რადგან Bedford Falls არის ადგილი, სადაც ადამიანების ცხოვრება ერთმანეთთან მჭიდროდ არის დაკავშირებული.
