Skrillex-მა თავისი ახალი ალბომი გამოსცა, რომლის გამხსნელი ტრეკი ქართველ მუსიკოსთან – Nitepunk-თან (ლაშა მამულაშვილი) კოლაბორაციით ჩაიწერა. Skrillex-ის ალბომს სწორედ ამ ტრეკის ერთი და იგივე სახელი – Soma ჰქვია და ის მუსიკალურ პლატფორმებზე 5 ივნისს გამოქვეყნდა.
ლაშა მამულაშვილმა, რომელსაც დღეს ელექტრონული მუსიკის მსმენელი Nitepunk-ის სახელით იცნობს, მუსიკალური კარიერა საქართველოში ჯერ კიდევ 2010-იან წლებში დაიწყო. 2015 წელს არტისტი შეერთებულ შტატებში გადავიდა და ამჟამად მსოფლიო Dance Music სცენის ამომავალ ვარსკვლავად მიიჩნევა.
„მიუხედავად იმისა, რომ ბევრ რამეს რაციონალურად ვუდგებოდი, როცა 2015 წელს შეერთებულ შტატებში ჩავედი, ძალიან ბევრი სირთულის გადალახვა მომიწია. ჩადიხარ დიდ ქვეყანაში, სადაც არავინ ხარ, დამოუკიდებლად უნდა იცხოვრო,” – აღნიშნა Nitepunk-მა Billboard Georgia-სთან 2023 წელს ჩაწერილ ინტერვიუში.
Nitepunk არაერთ ცნობილ ფესტივალზე გამოსულა, მათ შორის ერთ-ერთი იყო ცნობილი საკრუიზო ფესტივალი, სახელწოდებით Friendship, სადაც ერთ-ერთი ჰედლაინერი სწორედ Skrillex იყო.
