მადონას ფანებმა მისი ახალი ალბომის, Confessions II-ის ერთ-ერთი სიმღერის მოსმენა წინასწარ შეძლეს. სიმღერა Bizarre, რომელიც მომღერლის მომავალ ჩანაწერში შევა, მოულოდნელად ნიუ-იორკში, მარტინ გარიქსის კონცერტზე გაჟღერდა.
გარიქსმა Bizarre ენერგიულ საცეკვაო ბიტზე შეასრულა, რომელსაც თან ახლდა ვარდისფერ და იისფერ ფერებში გადაწყვეტილი შთამბეჭდავი სინათლის შოუ. ეს ის ფერებია, რომლებიც, სავარაუდოდ, Confessions II-ის ფერთა პალიტრაში იქნება გამოყენებული.
კვირა საღამოს გარიქსმა ინსტაგრამზე ვიდეო გააზიარა, რომელშიც 13 ივნისის კონცერტზე გაჟღერებული Bizarre-ის მცირე ფრაგმენტია ასახული. „მხოლოდ სიყვარული შეიძლებოდა ყოფილიყო ასეთი უცნაური,” – მღერის მადონა ფრაგმენტში.
Bizarre მადონას 16-სიმღერიანი ალბომის მე-10 ტრეკი და რიგით მეოთხე სინგლია, რომელიც მისი მე-15 ჩანაწერის გამოცემამდე გამოვა. აპრილში მან ალბომის პირველი სინგლი I Feel So Free გამოსცა, რასაც მოჰყვა დუეტი საბრინა კარპენტერთან Bring Your Love. ივნისის დასაწყისში კი Love Sensation გამოვიდა.
Confessions II-ში, რომელიც 2005 წლის Confessions on a Dance Floor-ის ერთგვარი გაგრძელებაა, მადონა კვლავ უბრუნდება პროდიუსერ სტიუარტ პრაისს. ეს ასევე იქნება მისი პირველი ალბომი Warner Records-თან დაბრუნების შემდეგ. ბოლო ალბომი Madame X მომღერალმა 2019 წელს გამოსცა და Billboard 200-ის ლიდერობაც მოიპოვა.
ახლახან გამოვიდა მადონას ფილმიც – CONFESSIONS II – The Film, რომლის პრემიერაც ნიუ-იორკში, Tribeca Festival-ზე შედგა. ფილმი უკვე ხელმისაწვდომია იუთუბზე.
