ივლისში ქართულმა ჯგუფმა Tape Visitors მსოფლიოში ერთ-ერთ ცნობილ მუსიკალურ ფესტივალზე – Mad Cool-ზე დაუკრა. ჯგუფმა შესარჩევ ტურში – Mad Cool Talent-ში გაიმარჯვა, რომელიც მსოფლიოს სხვადასხვა ქვეყნიდან მუსიკოსებს საშუალებას აძლევს, კონკურსში მიიღონ მონაწილეობა და საბოლოოდ ფესტივალის პროგრამაში მოხვდნენ. 2026 წლის Mad Cool ფესტივალი აერთიანებდა ისეთ ჰედლაინერებს, როგორებიც არიან: Foo Fighters, Moby, The War on Drugs, Wolf Alice, Florence + The Machine, Jennie, Lorde, Twenty One Pilots, Kings of Leon, Pixies, Halsey, ნიკ ქეივი ბენდთან ერთად, Pulp, The Black Crowes, დევიდ ბირნი და სხვა ცნობილი შემსრულებლები.
Tape Visitors ფესტივალის სცენაზე 10 ივლისს გამოვიდა. ახლახან ჯგუფი საქართველოში დაბრუნდა. მსოფლიოში ერთ-ერთ ყველაზე მასშტაბურ ფესტივალში მონაწილეობის გამოცდილებაზე ბენდის წევრები Billboard Georgia-ს ესაუბრნენ.
ფოტო: @luiscarbxnell
ლიკა სირაძე:
„პირველ რიგში, ევროპის ერთ-ერთ ყველაზე დიდ ფესტივალზე დაკვრა დიდი პასუხისმგებლობა იყო. ამავდროულად, ემოციებით დატვირთულიც, რადგან ძნელია სრულიად უცხო აუდიტორიის აყოლიება და შენი ენერგიისა და ემოციის გადაცემა, მაგრამ ეს მოვახერხეთ და ამის დანახვა დაკვრის მომენტშივე უდიდესი სიამოვნება იყო.”
Tape Visitors არც ისე დიდი ხანია, რაც ქართულ მუსიკალურ სცენაზე გამოჩნდა. ჯგუფის შემადგენლობაში არიან ლიკა სირაძე, ნიკა ლაფაჩი, სანდრო მოსაშვილი და სანდრო ფოცხიშვილი. Tape Visitors 2024 წელს AlterVision-ის მუსიკალური კონკურსის Newcomers Tbilisi-ის გამარჯვებული გახდა და იმავე წელს Tbilisi Open Air-ის მთავარ სცენაზე დაუკრა.
ლოკალური ბენდისთვის საერთაშორისო მასშტაბით ერთ-ერთ წამყვან ფესტივალზე დაკვრა, ცხადია, დიდი გამოწვევა აღმოჩნდა. როგორც ლიკა ამბობს, ყველაზე დიდი გამოცდილება Mad Cool ფესტივალის არტისტისა და მონაწილის პერსპექტივიდან გაცნობა იყო.
ფოტო: @luiscarbxnell
ნიკა ლაფაჩი:
„ვნახეთ, ორგანიზატორები როგორ აფასებენ თითოეულ არტისტს და რამხელა ძალისხმევას დებდნენ, რომ როგორც არტისტს, ასევე ფესტივალზე მყოფ ნებისმიერ ადამიანს თავი მაქსიმალურად კომფორტულად ეგრძნო”.
საზღვარგარეთ გამართული ტურნეები არტისტებისთვის ხშირად ახალი გამოწვევა და გამოცდილებაა. ადგილობრივი სცენისგან განსხვავებით, უცხოურ აუდიტორიასთან ინტერაქცია მუსიკოსებისგან განსაკუთრებულ ენერგიასა და ძალისხმევას მოითხოვს. მიუხედავად იმისა, რომ Mad Cool-ის მსმენელისთვის ჯგუფი უცნობი იყო. ამ პერფორმანსმა Tape Visitors-ისთვის მნიშვნელოვანი მომენტი შექმნა.
ფოტო: @luiscarbxnell
ლიკა სირაძე:
„აუდიტორიასთან კომუნიკაციაში ყველაზე დასამახსოვრებელი მომენტი ალბათ ის იყო, როდესაც ჩვენს ბოლო სიმღერაზე მისამღერამდე ყველა ჩაიკუზა, მისამღერზე ახტნენ და მთელი დარჩენილი სიმღერა ერთობოდნენ, იღიმოდნენ, იცინოდნენ, ცეკვავდნენ. ფესტივალზე ერთი სასაცილო მომენტიც იყო: საპირფარეშოს რიგში ვდგავარ backstage-ში და უცებ ვიაზრებ, რომ ჩემს უკან დგას Interpol-ის ვოკალისტი, რომელსაც ნახევარ საათში მთავარ სცენაზე უნდა დაეკრა. რამდენიმე წუთის შემდეგ მივედი, რა თქმა უნდა, და გავიცანი. სხვათა შორის, ძალიან მეგობრული ადამიანი იყო. ასევე გავიცანით Pixies და Twenty One Pilots.”
მასშტაბურ საერთაშორისო ფესტივალებში მონაწილეობა არტისტებისთვის არა მხოლოდ გლობალური აუდიტორიის ათვისების, არამედ მნიშვნელოვანი ინდუსტრიული კავშირების დამყარების შესაძლებლობაა. ბენდის წევრების თქმით, Mad Cool-ზე დაკვრა, შეძენილი კონტაქტები და მიღებული შეთავაზებები ქმნის შესაძლებლობას, რომ ბენდი კიდევ ერთხელ დაბრუნდეს ესპანეთში.
ფოტო: @luiscarbxnell
Tape Visitors ამჟამად აქტიურად წერს ახალ ნამუშევრებს Subor Records-ში. ბენდს უკვე დასრულებული აქვს 2 ტრეკი, რომლებსაც უახლოეს მომავალში გამოუშვებს.
