„მოიმარაგეთ ჯინი და წვენი“ – სწორედ ასე იწყება Snoop Dogg-ის ბიოგრაფიული ფილმის შესახებ გავრცელებული ოფიციალური განცხადება. Universal Pictures-მა 21 ივლისს ოფიციალურად დაადასტურა, რომ ფილმის პრემიერა აშშ-ის კინოთეატრებში 2027 წლის 6 აგვისტოს შედგება.
პრესრელიზში ფილმი შეფასებულია Snoop Dogg-ის (რომლის ნამდვილი სახელიცაა კელვინ ბროდუსი) „საბოლოო და სრულყოფილ ბიოგრაფიულ ფილმად“.
Universal Pictures-ის ფილმი, რომლის რეჟისორიც კრეიგ ბრიუერი იქნება, ეკრანებზე 2027 წლის 6 აგვისტოს გამოვა. რეპის ლეგენდას კი Outer Banks-ის ვარსკვლავი ჯონათან დევისი განასახიერებს.
ფილმი, რომლის სახელწოდებაც იქნება – Snoop, R კატეგორიის რეიტინგში განთავსდება, რაც ფილმებს ასაკობრივი შეზღუდვის დროს ენიჭებათ.
ჯერჯერობით უცნობია, ბიოგრაფიული ნამუშევარი Snoop Dogg-ის მრავალფეროვანი კარიერის კონკრეტულ პერიოდზე გაამახვილებს ყურადღებას თუ მის სრულ ცხოვრებას მოიცავს.
უნდა ითქვას, რომ Universal Pictures-ს მუსიკოსებზე ბიოგრაფიული ფილმების შექმნის წარმატებული გამოცდილება აქვს. სტუდიას ეკუთვნის ისეთი აღიარებული პროექტები, როგორებიცაა N.W.A-ის ბიოგრაფიული ფილმი Straight Outta Compton და ემინემის მონაწილეობით გადაღებული 8 Mile.
Snoop Dogg-მა ფილმთან დაკავშირებულ გეგმებზე პირველად აპრილში, CinemaCon-ზე ისაუბრა და აღნიშნა, რომ გადაღებები მიმდინარე ზაფხულში დაიწყებოდა.
„მას შემდეგ, რაც ჩემმა ძმებმა საკუთარი ისტორია Straight Outta Compton-ში გააზიარეს, ახლა ჩემი ჯერია,“ – განუცხადა რეპერმა ლას-ვეგასში აუდიტორიას.
მან ასევე რეჟისორ კრეიგ ბრიუერზე იხუმრა:
„ჩემმა რეჟისორმა კრეიგ ბრიუერმა ჯერ Hustle & Flow-ში გვიჩვენა, თუ რამდენად რთულია აქ ცხოვრება, გასულ წელს კი Song Sung Blue-ში ყველას Sweet Caroline ამღერა.“
N.W.A-ისა და ემინემის გარდა, ჰიპ-ჰოპის სხვა ლეგენდების ცხოვრებაზეც არაერთი ფილმია გადაღებული, მათ შორის არიან: 50 Cent, The Notorious B.I.G.- და 2Pac.
54 წლის ასაკშიც კი, Snoop Dogg კვლავ აქტიურად აგრძელებს მუსიკალურ საქმიანობას და პარალელურად უამრავ სხვა პროექტს ახორციელებს. 17 ივლისს მან Kurupt-თან და DJ Battlecat-თან ერთად ახალი ტრეკი – Me N the Boyz გამოუშვა.
კარიერის განმავლობაში Billboard Hot 100-ში Snoop Dogg-ის 45 სიმღერა არის შესული. მათ შორისაა ჩარტის პირველ ადგილზე გასული Drop It Like It’s Hot, ასევე კეტი პერისთან ერთად ჩაწერილი ჰიტი California Gurls და Akon-თან კოლაბორაცია – I Wanna Love You, რომლებშიც ის მოწვეული არტისტის სტატუსით მონაწილეობს.
ნახეთ ფილმის ოფიციალური ანონსი, რომელიც რეპერმა Instagram-ზეც გააზიარა.
