Pitbull დაბრუნდა. „ბილბორდის” ექსკლუზიური ინფორმაციით, არტისტი მე-14 სტუდიურ ალბომზე მუშაობს, სახელწოდებით Pitcoin.
პროექტის შესახებ, რომელიც 8 ოქტომბერს გამოვა, ახალი ამბავი მუსიკოსის I’m Back Tour-ის მსვლელობისას ვრცელდება. ტურნე მოიცავს აშშ-ს, ევროპას, კანადასა და დიდ ბრიტანეთს. დიდ ბრიტანეთში Pitbull-მა გინესის მსოფლიო რეკორდი დაამყარა ყველაზე მეტი ადამიანის შეკრებით, რომელთაც მელოტი ქუდები ეხურათ.
კუბელ-ამერიკელმა მომღერალმა, რომელმაც ბიზნესმენის სტატუსიც მოიპოვა, 2023 წლის ივლისში რიგით მე-13 ალბომი Trackhouse გამოსცა. ამ პერიოდში ის განაგრძობდა საკუთარი ბიზნესიმპერიის გაფართოებას, რომელიც მოიცავს ლეიბლ Mr. 305 Records, არყის ბრენდ Voli 305 Vodka-სა და SiriusXM-ის არხს Globalization. ის ასევე აქტიურადაა ჩართული საქველმოქმედო საქმიანობაში. არის SLAM! (Sports Leadership Arts Management)-ის დამაარსებელი – უფასო საჯარო სკოლების ქსელის, რომელიც ამჟამად აშშ-ის 14 კამპუსში 10 000 მოსწავლეს ემსახურება.
ტურნეს ბოლო კონცერტის შემდეგ, რომელიც 26 სექტემბერს მინესოტაში გაიმართება, არტისტი მაიამიში გაემგზავრება, რათა მონაწილეობა მიიღოს „ბილბორდის” ლათინური მუსიკის კვირეულში. ის შეუერთდება ღონისძიების მონაწილეთა შთამბეჭდავ სიას, რომელიც მოიცავს: კენი გარსიას, ლოლა ინდიგოს, ჯეი უილერს, რაიან კასტროსა და სხვებს. უახლოეს კვირებში კვირეულის ორგანიზატორები სხვა არტისტების ვინაობებსაც დაასახელებენ.
ლათინური მუსიკის კვირეული 19-22 ოქტომბერს მაიამი ბიჩზე გაიმართება. ღონისძიება ლათინური მუსიკის ინდუსტრიის ყველაზე ხანგრძლივი ისტორიის მქონე და ერთ-ერთი ყველაზე მასშტაბური და გავლენიანი შეკრებაა.
კვირეული 2026 წლის Billboard Latin Music Awards-თან ერთად გაიმართება, რომელიც 22 ოქტომბერს მაიამიში შედგება და პირდაპირი ეთერით გადაიცემა.
